Никогаш не сум избегал од соочување со правдата. До последен ден одев на судските рочишта и за тие кои одблиску и непристрасно го следеа процесот покажав и докажав дека ме судат без вина во очигледен политички прогон со политички монтиран процес и дека судот, исто како и обвинителството, е ставен во политички цели и работи со политички мотиви и инструкции, и одговори на Фејсбук експремиерот Никола Груевски на обвинителката Вилма Русковска која на денешното судење за „27 април“ кажа дека Груевски кукавички избегал кога требало да се соочи со правдата.
– Затоа кога веќе завршија и се исцрпеа сите можни начини за докажување на вистината, соочен со неправдата и пораките за линч кои ги добивав, одлучив да заминам од земјата и времено да се засолнам од налетот на политичкиот прогон врз мене.
Неправедно и незаслужено, без вина и со политички конструиран случај да треба да влезеш во затвор во кој ти се спрема ликвидација, не е воопшто соочување со правдата. Како што не е бегање од правдата ако одбиеш да го прифатиш тоа, пишува меѓудругото Груевски на Фејсбук.
