Вкупно 140.809 тони комунален отпад е собран и транспортирани во изминатите 12 месеци, што претставува зголемување за 2.612 тони или 1,74 проценти во однос на лани, соопшти Јавното претпријатие „Комунална хигиена“.
Како што информираа од претпријатието, годинава се заменети и 490 дотраени контејнери на 140 микро локации во сите скопски општини, а извршено е и перење и дезинфекција на сите поставени контејнери во градот, како и на нивните микро локации.
„За подобрување на квалитетот на давањето на услуги, како и за зголемување на контролата на работата на претпријатието, изминатава година поставени се ГПС-уреди во специјалните возила за собирање на смет, со што се следи трасата на движење на возилата. Оваа мерка придонесе за намалување на просечната потрошувачка на гориво по тура за 0,94 литри или за 4,23 проценти во однос на 2017 година“, информираат од „Комунална хигиена“.
ЈП „Комунална хигиена“, во акција за чистење на дивите депонии, годинава подигна и расчисти 5.144 кубни метри отпад, што претставува зголемување од 516 проценти во однос на истиот период минатата година.
Во текот на 2018 година Службата за хуман третман и контрола залови 1.182 бездомни кучиња од скопските улици што се транспортирани во стационарот „Вардариште“ кои имаат добиено соодветен медицински третман што опфаќа прочистување од внатрешни и надворешни паразити, вакцинирање од беснило и стерилизација. Покрај заловувањето и третманот на кучињата, во текот на 2018 година организирани се поголем број на акции за вдомување на кучиња, при што од страна на граѓаните се вдомени 147 кучиња.
Во делот на инвестициони вложувања е набавено и едно специјално возило наменето за заловување и транспорт на бездомните кучиња од скопските улици, се наведува во соопштението од Град Скопје.
Во тековната 2018 година претпријатието оствари позитивен финансиски резултат и поголема добивка во работењето од четири милиони денари во однос на минатата година.
