Градоначалникот на општина Гази Баба, Борис Георгиевски, денеска се пожали дека 4 недели Општината се соочува со бојкот од советниците на ВМРО-ДПМНЕ за донесување на ребалансот на буџетот.
– Иако немаа ниту една забелешка, ниту на координацијата ниту на расправата, сепак се одлучија за стопирање на суштинските точки кои ќе значат дополнителен развој за општината, а со тоа и подобри услови за живот на граѓаните. Според нив, буџетот не бил развоен и се крателе средства од него, се префрлале за непродуктивни трошоци на општината. Во сето ова има само една вистина и сите овие обвинувања се празни бидејќи имаат само една цел, да се закочи работата на општината – вели Георгиевски.
Тој вели дека на 17. јули побарал координација со советничките групи и коалициите, и да најдат заедничко решение. Но, од советниците на ВМРО-ДПМНЕ до денеска не добил никаков одговор.
Тој ги покани сите заинтересирани граѓани на следната седница на Советот да присуствуваат за да слушнат и видат за сѐ што досега зборувал, па потоа сами да заклучат кој ја блокира работата на општина Гази Баба, а со тоа и реализацијата на проектите кои се од суштинско значење за нивните населени места.
