Го слушам гласноговорникот на ВМРО-ДПМНЕ како вели дека новата Влада вработувала само членови на СДСМ!? Се чудам… Дали опозицијата се „јавува“ само да критикува или навистина ВМРО-ДПМНЕ не знае како се врши вработувањето во Македонија. Демек, како онаа народната:„ Поддржи ми го копилево, да ѝ се насмеам на копиларкава!“. Да, токму така.
Зарем навистина ВМРО-ДПМНЕ ја откри Америка или заборави како единаесет години вработуваше? Зарем тие не вработуваа само партиски војници? Зарем и за нив важеа дипломите или само за добивање на убаво столче во администрацијата им беше потребна само партиска книшка? Заборавија ли дека поради таквата политика голем број, најквалитетни кадри, првенци на факултетите, што немаа партиска книшка, не само што не беа вработени, туку своето знаење мораа да го однесат надвор од Македонија. Тие никогаш нема да се вратат назад.
Странците ни велат дека имаме голема и неквалитетна администрација. Они викаат, они си слушаат! Ние си тераме по наше. Кој ја направи таа администрација? Сигурно не странците. И ВМРО-ДПМНЕ, а и СДСМ многу добро го знаат одговорот. Јавна тајна е дека оние „послушните“, што трчаа, што лепеа плакати, што кинеа постери, тие иако немаа дипломи, а простете, некои немаа ниту средно, со години се „администратори“ . „Тука лежи заекот“ што имаме толку „добра“ администрација и во Министерствата и во здравството и во образованието, а и каде ли уште не.
Ако „трчаш“, ако „викаш“, ако знаеш да ги „пцуеш“ другите , па и ако треба и да се тепаш, Партијата, како награда, ќе те вработи на убаво место. „Лежи лебу да те јадам“. Или „Нишај врата земај убава плата!“. Така беше, а за жал, малку помалку, така и продолжува.
Сето ова добро го знае гласноговорникот на ВМРО-ДПМНЕ. Кажува дека десетмина биле неправилно вреботени. Абре момче, си велам, ако се десетмина „алал“ нека им е. Стотици и стотици се. А на ред чекаат уште десет пати по толку. Го знае тоа гласноговорникот но, се прави „на Тошо!“.
Знае дека ако некогаш дојдат на влас, ќе го „чека“ убаво работно место. „Ваквото“ вработување го знаат сите, но чудно е што и „новите“, кој ветуваа дека партиските книшки нема да бидат „визи“, го прифатија истиот „терк“ на предходните. Се грижат за своите членови, а за неопределените и за идните експерти, ама баш не им е гајле. Заборавија на ветувањата, па наместо да ја намалат неквалитетната администрација, тие ја зголемуваат и тоа со неквалитетни кадри. Нема веќе места во државните и јавните претпријатија. Нема столче во канцелариите каде да се стави. Финансискиот „обрач“ ќе пукне. Не може да издржи. Новите мора да застанат со вработување. Мораат да го почитуваат ветувањето. А гласноговорникот на ВМРО-ДПМНЕ и понатаму нека „ломоти“. Белким, некој ќе му поверува.
