Пратеничката група на опозициската ВМРО-ДПМНЕ конечно до кабинетот на претседателот на Собранието, Талат Џафери ги достави имињата кои тие ќе ги поддржат за членови на ДИК.
Со ова се очекува да се одблокира процесот за избор на составот на ДИК, но, исто така, е и своевидна потврда дека пратеничките групи се договориле да го реализираат она што беше договорено на понеделничката лидерска средба во Клубот на пратениците.
Од кабинетот на Џафери велат дека веднаш ги испратиле материјалите до пратеникот Илија Димоски кој е претседател на Комисијата за избори и именување. Димоски треба да закаже седница на комисијата во рок од три дена.
Димовски во изјава за државната агенција МИА изјавил дека седницата на Комисијата ќе закаже веднаш штом ќе ги добие материјалите, но со оглед на тоа што Џафери веќе му ги испратил не се исклучува можноста уште денеска да се закаже и одржи седницата на комисијата.
Штом заврши тоа, и Џафери ќе може да свика пленарна за да се изгласа целиот пакет закони. Ваквиот расплет би можел да се спроведе дури и за денеска, а најдоцна би требало да биде во сабота. Во Изборниот законик покрај изборот за ДИК е и формирањето на техничка влада пред секои парламентарни избори, според пржинскиот модел. Во пакет е и Законот за финансирање на политички партии, каде беа заглавени преговорите поради обидот на опозицијата преку овој закон да издејствува измени во Кривичниот законик во членот 165 со кој се регулираат казните за злоупотреба на средствата за финансирање на изборна кампања.
Кога станува збор за ДИК, на јавноста веќе и се познати имињата на новите членови кои треба да бидат изгласани. СДСМ ги предлага Борис Кондарко, Јанаки Витановски и Радица Ристевска, а ВМРО-ДПМНЕ Оливер Дерковски и Елизабета Постоловска, ДУИ ја предложи Дитмире Шеху, додека БЕСА излезе со предлогот Енвер Салиу.
Претседател на комисијата ќе биде Дерковски од опозициската ВМРО-ДПМНЕ, имајќи предвид дека консензуалниот договор на партиите беше овој привремен состав на ДИК да се бира по стариот модел со партиски претставници.
