ВМРО – ДПМНЕ ги повикува сите граѓани на Република Македонија, кои, како што порачаа денеска, не сакаат криминалот да продолжи да царува да се приклучат на протестниот марш во 18 часот вечерва.
Протестот ќе почне пред Јавното обвинителство на платото на МОБ, до Врховниот суд.
– Зоран Заев три години владее криминално и деспотски во Република Македонија. Тој е главата на октоподот, кој штелува обвиненија, диктира пресуди и мести милионски тендери во исто време. Заев нарачува, Врховен извршува, а Катица Јанева е запознаена за се. Сите чувме како без Заев не може да помине одлука на Врховен суд. Како без Заев, Катица ништо не правела, како без Заев судскиот систем не може да одлучува самостојно – рече Орце Ѓорѓиевски, член на ИК на ВМРО-ДПМНЕ на прес конференција.
Тој вели дека „аудио снимката пуштена во јавност е доказ дека во изминативе три години во Македонија нема поделба на власта на извршна, законодавна и судска.
– Имало еден човек кој бил се, тоа е Зоран Заев, главата на октоподот, шефот на мафијата во Република Македонија. Ова не е европска иднина. Ова е само еден од редицата случаи во кои Заев директно се вмешал. За други случаи како што вели и тој самиот судиите кои ги притискал веќе знаат како размислува и носеле одлуки по негов терк и без да прашаат. Ова е причината поради која угледниот магазин ЕКОНОМИСТ ја прогласи Република Македонија под Заев за хибриден режим. Криминалот, корупцијата и рекетот мора да запрат. Македонија нема повеќе време за губење – порача Ѓорѓиевски.
