Владата на британскиот премиер Борис Џонсон ќе се согласи со амандманот кој го вложија опозициските партии за да се одржат избори на 11 декември, јави денеска Би-Би-Си повикувајќи се на неименувани извори од Кабинетот на Џонсон.
Тој вчера рече дека ќе се обиде да го „протурка“ во Парламентот законот за одржување избори на 12 декември, но противниците сакаа порано.
Британскиот премиер, кој вети дека Брегзит ќе се случи на 31 октомври по секоја цена, повеќе пати бараше да се одржат избори за да се заврши, како што наведе, „кошмарот со парализата која ја одзема довербата на јавноста, спречувајќи секаков исход од Брегзит“.
– Нема да дозволиме оваа парализа да продолжи и на еден или друг начин мораме да одиме директно на избори – рече Џонсон вчера во Парламентот.
– Овој дом (Долниот дом на британскиот парламент) не може да ја држи оваа земја како заложник – рече Џонсон.
Првите божиќни избори во Британија од 1923 година ќе бидат многу непредвидливи, гласачите ќе имаат избор меѓу Џонсон кој се залага за Брегзит и лидерот на Лабуристите Џереми Корбин кој се залага за повторно преговарање за договорот пред референдумот.
ФОТО: EPA / STEPHANIE LECOCQ
