Пратеникот на ВМРО-ДПМНЕ Трајко Вељановски побара претседателот на Собранието Талат Џафери да ги тргне од дневен ред измените на Изборниот законик оти никогаш досега тој не бил носен без коснезус.
– Еве оти за сѐ што ви се брза ставате европско знаменце, предлагам да нзаначите во Собранието посебна сала која ќе се именува „Европско знаменце„. Не ми е јасно како мислите Изборен законик да носите на сила – рече Вељановски.
Претходно Џафери, рече дека партиите во парламентот се усогласиле и предложиле закон за измени на изборниот законик за деблокирање на процесот за избор на ДИК, без која не може да функционира ниту една институција.
– Партиите ветија дека нема да блокираат и затоа консензуално се согласија на двотретинско. Од непознати причини партиите тактизираа. Собранието не може да биде заробеник на волјата на некои партии. Нема пречка да се излезе со овој предлог закон без оглед како ќе се толкува. Собранието нема пречка да се изјасни за предлогот на владата. Тоа не е пречка партиите да продолжат со дебата за консензуално решение Предлогот може да се повлече, но да биде јасно дека Собранието нема да биде заложник на партиски интереси – рече Џафери.
На пратеникот од ВМРО-ДПМНЕ, Илија Димовски, кој од место дофрлаше дека Џафери држи лекции за блокирање на Собранието, спикерот му одговори: „Јас блокирав на комисија порано, но не сум ја попречил државата“.
Предлогот кој Владата го достави до Собранието за измени на изборниот законик е со европско знаменце, а во образложението се наведува дека целта е да се деблокира процесот за избор на ДИК. Од Владата бараат измените на изборниот законик да се гласаат по скратена постапка, но опозицијата не се согласува со овој предлог.
