Поглаварот на Римокатоличката црква, папата Франциск денеска ќе одржи света литургија на плоштадот „Македонија“ во Скопје.
Литургијата може да ја проследат само граѓаните кои имаат влезници, а пристапните влезови во литургискиот простор кон плоштадот се отворени од 6 часот до 9 часот. Литургијата се очекува да заврши до 13 часот.
На плоштадот „Македонијa“ веќе се собираат граѓани од земјава и од странство кои ќе ја проследат литургијата. За влез на плоштадот граѓаните мора да поминат низ неколку безбедносни проверки. Полицијата им одзема на граѓаните запалки, метални монети и други предмети. Покрај големото полициско присуство има и голем број волонтери на Црвен крст.
Плоштадот речиси повеќе од половина е исполнет со граѓани. Од присутните граѓани од странство најмногубројни се тие од Хрватска, Словенија, САД и од Кина. На плоштадот се присутни и функционери како заменик министерот за економија Kире Наумов, пратеникот Владимир Ѓорчев со семејството, гостиварскиот градоначалник Арбен Таравари…
Гостите од Хрватска пееја „Алелуја“ придружени со гитари. Погледнете ја атмосферата на плоштадот.
