Велосипедската тура ќе биде предводена од светскиот шампион и професионален спортист Џонас Колтинг, кој заедно со другите велосипедисти во текот на две недели ќе вози 2.500 километри. Почетокот на рутата е во Скопје. Велосипедистите ќе поминат низ Портата „Македонија“ и ќе возат до границата со Косово, а потоа низ Косово, Црна Гора, Босна и Херцеговина и продолжува низ останатите европски држави до финалната дестинација градот Варберг во Шведска. Тоа што турата „Cycle4Europe“ ќе почне од Скопје е симболично затоа што фондацијата има соработка со три дома за деца без родители во нашата држава.
Основачот на Фондацијата „Лоза“ Сабина Грубесон, која е еден од иницијаторите на „Cucle4Europe“ на денешната прес-конференција рече дека европските земји ја гледаат Република Северна Македонија со позитивни очи и интерес бидејќи, како што рече, развојот е процес на соработка.
– Преку „Лоза“ ние имаме волја да го поддржуваме локалниот општествен развој – рече Грубесон.
Колтинг соопшти дека целта е со утрешниот настан да се привлече внимание, да се информираат луѓето дека постои фондацијата „Лоза“ и да донираат средства за корисна работа. Колтинг, кој првпат е во нашата земја, изрази надеж дека ќе возат и видат убави предели.
Претседателот на Сојузот на специјални едукатори и рехабилитатори Горан Петрушев посочи дека се работи за тешка тура што можат да ја возат само професионалци.
Тој информира дека попладнево ќе бидат донирани 50 велиспеди на деца и младинци, поранешни и сегашни корисници од Јавната установа „25 Мај“ и „Ранка Милановиќ“ и Домот за деца без родители „11 Октомври“.
На градскиот плоштад вечер ќе има промотивен музички настан, со гостување на домашни пејачи и говорници од институции за подигнување на јавната свест за потребата од забрзување и проширување на процесот на деинституционализација.
Фондација „Лоза“ е добротворна организација основана во Шведска во 2017 година. Работи во корист на најранливите деца и млади, деца без родители и родителска грижа, деца и лица со попреченост кои се уште живеат во институции со цел да добијат подобра иднина. Ги поддржува домовите „25 Мај“, „11 Октомври“ и „Ранка Милановиќ“ со облека, чевли, зимски јакни, активности за зголемување на самодовербата.
