Се надевам дека народот на Македонија ќа ја искористи можноста на референдумот да гласа за иднината на земјата. За едно толку важно прашање должност на секој граѓанин е да гласа. Тоа е многу важно и тоа е суштината на демократијата. Можете да не се согласувате по многу прашања, но не смеете да имате несогласувања по однос на поддршка на одлуката за иднината на земјата.
Ова е пораката на копретседателот на Европската зелена партија и пратеник во Европскиот парламент Рајнхард Бутикофер, која ја упатил и за време на денешната средба со премиерот Зоран Заев.
Бутикофер кој е во посета на Македонија на покана на сестринската партија ДОМ, изрази поддршка за работата на ова партија и ја поздрави храброста на премиерот Заев во однос на напорите за деблокирањето на процесот на евроинтеграциите со постигнување на договорот за името.
– Насетив нов пристап во Брисел и во престолнината на мојата земја, во Германија, во Берлин, ново чувство на отвореност и на одговорност во однос на неопходноста за конечно приклучување на Балканот кон ЕУ. Тоа секако нема да се случи многу брзо, но треба да ја зграбите можноста – вели Бутикофер.
Осврнувајќи се на придобивките од членството во ЕУ, тој како една од најголемите го посочи запирањето на процесот на заминување на младите од земјата, која е една од земјите која губи висок дел од нејзината младина.
– Младите луѓе заминуваат во други делови од Европа бидејќи немаат надеж за иднината на земјата и за нивната сопстевна иднина, а тоа може да се спречи. Ако Македонија стане членка на ЕУ вие можете да бидете успешни во Скопје, исто како и во Берлин или Париз, бидејќи не сте изолирани, туку сте дел од семејството. Тоа е можеби најдобрата работа која може да произлезе од овој процес, кој исто така, покажува дека не мора да одлучувате да бидете Македонец и да одите во Европа. Ќе можете да бидете горди Македонци ако успеете да станете составен дел од Европа – рече Бутикофер.
Тој при тоа укажа на искуствата од придобивките на Полска, Словачка, од членството во ЕУ, како и на обостраните придобивки од пристапувањето на Македонија во Унијата.
Според претседателката на ДОМ Лилјана Поповска, несомнено е дека влезот на Македонија во ЕУ е посакувано од огромното мнозинство граѓани и тоа не е случајно, затоа што вели, независно од внатрешните проблеми што ги има ЕУ и сите несовршености, таа е сепак најпрогресивната организациона структура во светот со највисоки стандарди за демократија, за човекови права за животна средина. Таа го искажа и партискиот став за поддршка на референдумот.
– Референдумот, како непосредна директна демократија, не смее да се пропушти. Тоа е шанса за секого да го искаже својот став. Доколку не го стори тоа неговиот став ќе биде непознат, невидлив. Само искажан став на референдум ќе се брои и затоа мислам тоа е шанса што не смее да се пропушти – рече Поповска.
