Бранимир Јовановиќ, кој беше советник за финансии во Министерството за финансии, инаку, во јавноста познат како член на партијата Левица и еден од поистурените активисти во Шарената револуција, вечерва на својот профил на Фејсбук напиша дека се повлекува од Министерството, за да се посвети на семејството и на нештата кои ги сака.
„По скоро две години, се повлекувам од Министерството за финансии.
Одлукава ја донесов уште пред некое време, но не сакав да ја објавам додека не поминат изборите.
Имаше сѐ во овие две години, но сепак си заминувам со позитивни впечатоци. Бевме одличен тим и функциониравме навистина добро. Направивме доста работи, од кои најважна за мене е даночната реформа. Ги подобривме буџетските приходи, го намаливме дефицитот, го стабилизиравме јавниот долг. Кратко кажано – ги средивме државните финансии.
Сега е време да им се посветам на нештата кои ги запоставив овој период – семејството, блиските, нештата кои ги сакам“, напиша Јовановиќ.
