Бојан Јовановски Боки 13 тврди дека заедно со Зоран Милевски Кичеец му ја вратиле на Јордан Камчев чантата „Луј Витон“ во која биле спакувани 1,5 милиони евра, но Камчев рече чантата никогаш дека не му била вратена.
Откако сведокот Камчев заврши со сведочењето по прашања на обвинителката Вилма Русковска, обвинетиот Бојан Јовановски Боки 13 го испрашуваше бизнисменот.
Боки прво побара Камчев да му се извини јавно поради, како што рече, тешки квалификации што ги изнел против него на денешното рочиште.
Кога обвинителката Вилма Русковска се обиде да реагира за начинот на испрашување, Јовановски ѝ дофрли од место, „Не се дери, потивко“.
Судијката во текот на рочиштето неколку пати ги предупреди присутните да се однесуваат пристојно, а во спротивно ќе ги отстрани од судницата.
– Ова не е театар – рече судијката Васка Николовска-Масевска.
Во продолжението на соочувањето Боки 13 рече дека како менаџер на телевизија имал право да бара пари за реклама.
– Како менаџер на ТВ имам право да побарам средства за реклама колку што сметам дека треба, како што вие како менаџер на болница одлучувате колку пари за операција ќе побарате иако операциите ги вршите неуспешно – му се обрати Боки 13 на Камчев.
На тоа Камчев одговори дека Боки 13 не е менаџер, туку невработен.
– Мојот пријател Ивајло од Бугарија ми помогна во случајот – одговори Камчев на прашање на Боки да ги каже сите со име и презиме кои му помогнале.
– Дали сте свесен дека сте сториле кривично дело шпионажа? – го праша Боки 13 Камчев, цитирајќи членови и ставови од Кривичниот законик. Според судијката, прашањето беше нерелевантно.
Боки тврди дека заедно со Зоки Кичеец му ја вратиле чантата „Луј Витон“ во која биле спакувани 1,5 милиони евра на Камчев, но Камчев рече дека чантата никогаш не му била вратена.
– Не може да биде во торба „Адидас“, нема да личи. Му ги спакував во торба „Луј Витон“ оти он многу го љуби тој бренд. Па уште ми замери и за тоа дека парите биле по 50 евра, а тоа беше намерно така за да му ја наполнам торбата – рече Камчев додавајќи дека неговата сметководителка Мими ги пакувала парите.
Претходно, адвокатот на Бојан Јовановски Боки 13, Сашо Дуковски, го праша бизнисменот сведок Јордан Камчев дали случајот го пријавил формално и дали го пријавил само на Горан Николовски, а не во УБК.
– Јас пријавив кај Горан Николовски како пријател затоа што немаше кај кого во оваа држава да пријавам. Немаше институција каде што можеше да се пријави случајот. Сите беа во рекетот. Среќа што беа Николовски и Русковска – рече Камчев.
Тој преку телефон побарал средба со премиерот Зоран Заев за да му го пријави рекетот. Пред еден месец поднел и кривична пријава против обвинителката Лиле Стефанова.
– Знам дека платил и „Тинекс“, платил Главчев од Гевгелија, Дејан Панделевски, само тие не се одважија да кажат, но има материјали кои ќе го докажат тоа – рече Камчев сведочејќки дека и други бизнисмени биле рекетирани.
На прашање на адвокатот Дуковски, Камчев да објасни за првата деловна понуда од Боки, бизнисменот рече дека ја отфрлил зашто Јовановски се обидувал да му продаде памет, а дека најважно било што на тој договор бил потпишан синот на Јанева.
– Да ми беше Боки 13 девојка ќе се сеќавав кога била првата средба – рече Камчев, одговарајќи му на адвокатот Дуковски дека не се сеќава како дошло до првата средба со Јовановски, посочувајќи дека имале 50 средби.
Но додаде дека на сите тие средби Боки само гледал како да дојде до парите и дека сѐ што имал како доказ доставил до обвинителството.
Зборувајќи за Катица Јанева и за обвинителката Стефанова во однос на гаранцијата од 14 милиони евра што бизнисменот ја понудил а била одбиена Камчев наведе дека му ја отфрлиле зашто и двете обвинителки биле како хиени и сакале да земат пари.
Адвокатот Дуковски, пак, рече дека гаранцијата била одбиена поради тоа што била под хипотека, а не поради причините што ги наведе Камчев.
Во текот на испрашувањето Дуковски неколку пари беше опоменуван дека наместо директни прашања на Камчев му поставува вкрстени прашања како да е непријателски сведок и дека тој на некои прашања веќе одговорил во својот исказ.
Пишуваат:
Стојанка Митреска
Александра Митевска
