– Работев во 1 ТВ уште пред да почне да работи телевизијата. Работев на магазин како новинар во почетокот. Во првиот месец Бојан Јовановски рече да срочам најава за известување дека ќе истражуваме каков е квалитетот на флашираната вода што се продава. Додека уште го најавував тоа, по извесно време почна да се рекламира „Пелистерка“, јас немав информација дали ние сме пратиле мостри од водата на испитување – рече сведокот Баневски.
Тој раскажа дека добил новинарска задача да направи новинарска приказна за велешка фирма, а кога се јавил кај одговорните лица му рекле дека не сакаат да разговараат со новинарот затоа што, како што рече, телевизијата била рекетарска.
-Боки 13 ми го даде бројот на сопственикот и не се интересираше за приказната, туку дали бил уплашен. „Вие не сте новинари, туку работите како рекетари“, ми рече сопственикот. Од тоа јас бев навреден и потоа побарав образложение од Бојан и го прашав „дали го рекетирате овој човек“, на што ми одговори „оваа телевизија треба да живее од нешто‘. Тогаш реков дека не сакам да работам повеќе на такви приказни и ќе си заминам – рече Баневски.
Тој објасни дека уште додека одела најавата за истражувањето на минералните води во земјава, „Пелистерка“ станала генерален спонзор, па дури и ги повлекла рекламите по другите медиуми за да се рекламира на 1 ТВ. Примерот со „Пелистерка“ е класичен пример за рекет, додаде сведокот.
Новинарот раскажа дека една недела откако разговарал со Јовановски, пак се јавил во велешката фирма, но односот бил сосема коректен и не му било јасно што се случило.
– Бев најмногу шокиран кога имаше приведени во случајот „Империја“. Тогаш дојде Јовановски и ни рече за „Империја“ од сега нема ништо да се пишува. Тоа најмногу ме шокира затоа што претходно имавме слобода во известувањето – рече новинарот.
Тој раскажа дека во телевизијата го видел и бизнисменот од Гевгелија кој во средата сведочеше во „Рекет“.
– Кога влегов во канцеларија, таму беше Томе Главчев и ми кажаа дека треба да се снима сторија. Подоцна разбрав дека Главчев имал проблеми со Јанева и не ми беше јасно што се случува – рече Баневски.
На прашање на адвокатот Дуковски дали пак контактирал со сопственикот на велешката фирма „Агриа“ тој одговори дека контактирал само два пати телефонски.
