Со новиот Закон за високо образование универзитетот што досега свесно беше ставен на маргините на општеството, повторно станува важен дел на системот. Ја обезбедуваме уставно загарантираната академска слобода, достоинство на професорите и на студентите и го враќаме угледот на универзитетот, порача пратеникот на СДСМ Петар Атанасов.
– Три основни начела се вградени во новото законско решение: почитување на автономијата на универзитетот, дизајнирање на нов начин на управување со универзитетот, како и решавање на суштинските прашања, квалитетот и финансирањето во високото образование. Универзитетите, преку овој закон, им се враќаат на професорите и на студентите, без можност за дневно – политички влијанија во спроведувањето на нивната настава, научна и кадровска политика – рече Атанасов.
Тој потенцираше дека со законот се создадени услови државните универзитети вистински да се реформираат, не преку централизација на дејноста и функциите, туку преку подемократско и потранспарентно управување во кое одлучувачки фактор ќе бидат професорите, нивните матични институции и студентите.
