Единицата за атомско-биолошка и хемиска одбрана на Армијата по барање на надлежните за мерење на загаденост на почвата, доцна попладнево асистираше при отстранување на токсичната материја метил акрилат мономер од дворот на фабриката „Охис“.
И од Институтот за хемија тврдат дека метил акрилат мономер кој истекол, бил токсичен.
Инспектори од Министерството за животната средина велат дека нема простор за паника дека излевањето ќе има последици по безбедноста на луѓето.
Државниот инспекторат за животна средина информираше дека при извршениот увид во фабриката „Охис“ земен е примерок кој ќе биде испитан, а правниот субјект е задолжена да работи на терен цела ноќ за целата излеана течност биде преточена во соодветно пакување. Утре, како што најавуваат од Инспекторатот, ќе биде направен контролен инспекциски надзор.
Според Инспекторатот за животна средина, истекувањето се случило на локација каде фирма од Скопје препакувала и отстранувала историски отпадни хемикалии во течна состојба кои се неупотребливи и останати од поранешната фабрика, а кои ќе се извезуваат во странство. Истечена е вода од цистерна во која претходно бил складиран метил акрилат мономер. При миењето на цистерната попуштил вентил и течноста се излеала во бетонска када која е надвор од објектот поради што се почувствувала непријатна миризба во околината.
– Историскиот течен опасен отпад е безбедно преточен во специјални ADR буриња од страна на правниот субјект Екоцентар 97, Скопје (http://ekocentar97.mk/), во август месец годинава, врз основа на одобрен Елаборат за животна средина од страна на Министерството за животна средина и просторно планирање како изведувач на активностите, во депото каде беше лоциран историскиот течен опасен отпад, а во соработка со подизведувачот бугарската фирма Сириус Стар од Русе. Преточувањето на течниот опасен историски отпад од старите буриња безбедно се направи со соодветна опрема во нови ADR специјални буриња кои се сместени во затворен наменски магацин и истите се обележани согласно Правилникот – Листа за видови отпад. Активностите беа проследени со вонреден инспекциски надзор од страна на Државниот инспекторат за животна средина. Складираните буриња е планирано да се извезат надвор од државата согласно важечките законски процедури за извоз од Законот за управување со отпадот – велат од Инспекторатот за животна средина.
