Стратешката цел на Македонија за членство во НАТО на многу генерации од нашата земја станува реалност, рече во обраќањето премиерот Зоран Заев на Состанокот на лидерите на НАТО во Лондон, по повод 70 годишнината на Алијансата.
Тој во своето обраќање, како 30-ти говорник, истакна дека настанот ја потврдува заедничката посветеност на сојузниците за обезбедување мир, стабилност и просперитет во целата евро-атлантска област, што беше поздравено со аплауз од лидерите на алијансата.
Заев изрази задоволство и благодарност за брзата динамика на ратификување на Протоколот за пристапување на Македонија во НАТО како цврст доказ за тоа колку е добредојденa земјата во трансатлантското семејство.
Премиерот потенцираше дека Македонија е спремна да ја преземе обврската како полноправна членка да го дава нашиот придонес за одговори за менување на мултидимензионалните безбедносни предизвици што стојат пред НАТО.
Во таа насока, истакна тој на состанокот на лидерите на НАТО во Лондон, Македонија презема трансформативни реформски процеси за стабилна и одржлива проекција за финансирање во одбраната и за правично споделување на обврските со зголемување на буџетот за одбраната на земјата од 0,2% од БДП годишно со цел да достигнеме 2% од БДП до 2024 година. Важен дел од ова издвојување, околу 23%, се посветени на модернизацијата на армијата.
Заев потсети дека армијата на Македонија активно учествува во мисиите на НАТО уште од 2002 година во Авганистан, и ќе продолжи да го дава својот придонес како сигурен партнер на НАТО во борбата против тероризмот.
Во завршницата на своето обраќање тој нагласи дека членството на Македонија во НАТО е стабилизирачки фактор за регионот и поттик за останатите земји од Западен Балкан што изразија определба да станат членки на алијансата, и го изрази очекувањето дека на церемонијата за подигнување на знамето на Северна Македонија пред седиштето на НАТО, симболично ќе се запечати нашето место меѓу сојузниците кои се обединети за слобода, мир и демократија.
