Сведокот Ана Камчева, сопругата на бизнисменот Јордан Камчев во денешното рочиште сведочеше дека братот на судијката Весна Димишкова, Васил, ѝ рекол дека за сума од два до шест милиони евра Камчев може да добие поблага мерка во случајот Империја.
Таа зборуваше и за првата средба со обвинителката Лиле Стефанова и со обвинетата Катица Јанева во Кривичниот суд и раскажа за, како што рече, недоличното однесување на обвинителката Стефанова.
„Ништо не ми можеш Тони, моќта е кај мене“, му рекла Стефанова на адвокатот Антонио Апостолски, бранител на Камчев во предметот Империја, изјави Камчева на денешното рочиште за случајот „Рекет“.
Таа додаде:
– Бојан точно знаеше кога мојот сопруг ќе биде повикан во СЈО, за какви прислушувани разговори станува збор. Тој располагаше со информации и имаше комуникација со Јанева – посведочи Камчева.
Таа кажа дека околу 15 ноември 2018 ѝ се јавил Милески, кој бил вознемирен и инсистирал да се видат во хотелот „Александар Палас“. Рече дека ја терал да кружат околу хотелот, за да не ги прислушуваат.
