Од информациите кои ни пристигнуваат од локалните штабови на Алтернатива, претседателските избори, како во првиот, така и во вториот круг, беа коректни, праведни и не се забележани инциденти, кои можеа да му наштетат на кредибилноста на изборниот процес, изјави Африм Гаши претседател на Алтернатива.
– Државата, овој пат, го положи испитот на демократската зрелост, а овој процес беше еден вид потврда дека оваа влада има капацитети да организира праведни и уредни избори, за кои веруваме дека ќе бидат вреднувани и од релевантните меѓународни институции и ова ќе се валоризира и во одредување на датумот за отворање на преговорите за членство во ЕУ. Овие избори потврдија дека мнозинството на нашите граѓани се за западните вредности и за евро-атлантската интеграција на земјата. Дури и излезноста на овие избори, постигнувањето на потребниот цензус и изборот на кандидатот што гарантира стабилност, интеграција и просперитет, е уште една потврда за нашата стратешка определба – рече Гаши.
Тој додаде дека му ја честитаат победата на кандидатот Стево Пендаровски. и дека неговата победа е најдобар показател на ниванта партиска определба, но и за тоа дека Албанците во Северна Македонија се елементот кој ја одредува стратешката иднина на земјата.
