Мојот совет е дека треба да има протести секогаш кога политичарите прават погрешни потези, но протестите треба да се организираат според некоја веќе воспоставена пракса – на јавна површина. Протести пред домови на пратениците практикуваше Шарената револуција, а сега тоа го гледаме како репетицио. Според мене тоа не е добро.
Ова го порачува Илија Димовски, еден од највредните пратеници во македонскиот парламент, факт кој не го негираат ниту колегите од владејачкото мнозинство, а неговите сопартијци пак ги надополнуваат: „Иле, дискутира и работи 300 на саат“.
Илија Димовски, кој со поддршка на повеќе од триесетина членови на ВМРО – ДПМНЕ отворија фронт против политиката на континуитет „И по Груевски, Груевски“, пред изборот на нов лидер, збрува и за промените во неговата матична партија по конгресот во Валандово и за новите политики со кои очекува ВМРО – ДПМНЕ повторно да ја освои власта на наредните избори.
Со пратеникот Димовски, кој е неприкосновен оратор во собраниската говорница, во интервју за Плусинфо, освен за актуелните протести поттикнати од донесувањето на Законот за јазиците разговараме и за најавените партиски мајски демонстрации и за барањето за предвремените избори, за владеењето на СДСМ….
Законот за јазиците и начинот на кој тој беше изгласан во Собранието, покрена бура реакции и протести пред домовите на пратениците што гласаа за него. По ова почнаа да се плетат секакви приказни за нарачателот и организаторите, а се споменуваат политичари од ВМРО – ДПМНЕ кои се одметнале од Мицкоски и наводно зад негов грб прават притосок врз пратеници од СДСМ. Господине Димовски кој ги организира протестите и дали групата пратеници што Ве поддржа, кога отворивте фронт против Груевски и Мицкоски, стојат зад овие протести?
ДИМОВСКИ: Не, апсолутно не. Кој ги организира, полека во јавноста и ова ќе станува јавно, како и сите други работи. Јас сепак, фокусот би го ставил на акцептирањето на состојбата дека постои сериозен револт кај граѓаните во врска со овој закон, и тоа на две линии. Првата линија, пред се однесува на содржината на законот и прекршувањето на материјалното уставно право на Република Македонија, со внесување на одредби кои се надвор од Уставот на Република Македонија. Втората линија е, грубото и силеџиско протурнување на законот низ Собрание, негирајќи ги суверените права на граѓаните да имаат свои застапници во парламентот, и преку тие свои застапници, односно праеници да го остваруваат правото да влијаат во донесувањето на одлуки. Влијанието во донесувањето на одлуки се прави со поднесување на предлози и амандманаи, но и со правото на глас на пратениците, како пренесено суверено право на граѓаните. Оттука, мислам дека сите критики може да бидат анализирани кон протестите, но доколку не го најдеме изворот, нема да воспоставиме добра дијагноза. Изворот на овие протести е немањето слух на СДСМ спрема сите критики кон законот кои се случија во минатите неколку месеци. Тука, зботувам за критики кои не доаѓаат само од ВМРО – ДПМНЕ, како политичка структура, туку ако сакате и како идеолошка компонента на нашето општество, туку доаѓаа од многу видни личности, експерти, професори по право кои во својот животен век имаат сериозни конекции со СДСМ. Дел од нив како членови на СДСМ, а дел и како функионери на оваа партија. Немањето сух кај СДСМ и кај ДУИ да го акцептираат тој револт и тоа спротивставување на целото општество, предизвика негативна енергија, што е нормално и се случува секаде, а сме го виделе и претходно во Македонија. Можеби сличниот однос на ВМРО, предизвика слични протести на СДСМ и на Шарената револуција. За волја на вистината, не е прв пат да гледаме вакви протести пред домови на пратеници. Тоа се случуваше и пред домовите на пратениците од ВМРО – ДПМНЕ. И тогаш и сега сметам дека тоа не е добро. Денеска од идеолошка и од политичка причина се разликуваме, а утре може да носиме закон со кој би забраниле некоја стопанска дејност која загрозува животната средина и да му посметаме како пратеници на некој бизнисмен кој секогаш може да прати стотина луѓе пред куќата на кој било пратеник за да врши притисок. Тоа не е добро. На тој начин се создава лоша пракса, се руши кредибилитетот и на пратеникот и на парламентот, како основна организациона клетка на оваа држава. Ние, сепак, во ова препукување на партиите забораваме дека Македонија е парламентарна демократија. Протестите за мене се легитимно право на граѓаните, но мислам дека локацијата не е добро избрана. Мојот совет е дека треба да има протестите секогаш кога политичарите прават погрешни потези, но протестите треба да се организираат според некоја веќе воспоставена пракса, на јавна површина. Ова што сега се случува е пракса што ја воспостави Шарената револуција, а сега го гледаме како репетицио. Според мене тоа не е добро.
Протестите потикнаа и предлози да се забрани ВМРО – ДПМНЕ како партија, откако на социјалните мрежи се проширија разговори меѓу одговорните во општинските комитети на ВМРО-ДПМНЕ и членството, а во кои се повикува на вжешување на атмосферата.
ДИМОВСКИ: Јас би сакал да го осудам таквото размислување и да осудам дури и насловни страни кои повикуваат во таков правец. Тоа мене ми враќа фамилијарни спомени на тоталитарниот период на комунистичка Југославија во која беа вложени екстремни напори да се забрани и да се поништи ВМРО. Јас тоа го носам како фамилијарна традиција, дел од моите дедовци и прадедовци поминале низ таков непријатен период во животот. И мислам дека таквите идеи се класичен тоталитаризам. ВМРО – ДПМНЕ е идеолошки наследник на ВМРО, онака како што СДСМ е идеолошки наследник на СКМ. И тоа е легитимно. Во македонското национално движење и во Втората светска војна, и во илинденскиот, во предилинденскиот период, и во постилинденскиот период ние ги имаме тие две компоненти – на македонска левица и на македонска десница. Двете подеднакво се заслужни и двете подеднакво се виновни за добрите и за лошите работи во македонската историја. Мислам, дека оваа еуфорија на левичарските мисители како плод на тоа што нивната опција е на власт треба да се заузда. И треба некој да им посочи дека моментот на национално помирување е сериозно битен, но е возможен само кога левицата ќе прифати дека десницата е еднакво важна, и кога десницата ќе прифати дека левицата е исто така еднакво важна. За среќа, ние како народ сме немале големи погроми на идеолошка основа. Сме имале илјадници кои завршувале во затвор, имало ликвидации, исчезнувања, но компарирано со другите народи на Балканот, со српскиот, со хрватскиот, бугарскиот, не сме преживеале такви отворени конфликти по идеолошка линија. Тоа треба да го искористиме како предност на неопходното националното помирување, затоа, јас сериозно ги осудувам таквите идеи и нивното застапување.
Кој ги поттикнува?
ДИМОВСКИ: Тоа е плод на негативна енергија собирана во минатите десетина години спрема поединци од ВМРО – ДПМНЕ од едната страна и спрема поединци од СДСМ. Но, идејата што ја носи и со која е формирана ВМРО – ДПМНЕ не треба да се поврзува со ниту еден поединец. Низ историјата на модерното и на идеолошкото ВМРО има подеми и падови, но не треба да заборавиме дека ВМРО е првата организирана форма на идејата за самостојна Македонија. Без формирање на ВМРО немало да има Илинденско востание, без Илинденското востание немало да има партизански чети во 1941 година, без тоа немало да има АСНОМ, а без АСНОМ немаше да има ни 8 Септември. Таа е таа линија што треба да ја почитуваме, без разлика дали повеќе ни е симпатична политичката левица или десницата. Јас би бил посреќен, ако овие теми на левичарењето и на десничарењето ги оставиме зад нас и да зборуваме за реалните теми – за тоа кој е за поголеми даноци, а кој за помали, за субвенциите, за стимул на приватно стопанство, кој е за квалитетно образование, а кој за ефтино образование. Ние како пратеници треба да се посветиме на тие теми, никому не може да му забраниме да ги влече своите идеолошки логики, но тоа не е корисно.
Најавивте интерпелација за собранискиот претседaтел Талат Џафери, ја поднесовте ли?
ДИМОВСКИ: – Не, се уште не е поднесена интерпелацијата. Ќе ја поднесеме тогаш кога ќе оцениме дека е вистинскиот момент. Ние се уште не доаѓаме на седници, а мнозинството може да ја помине без наше присуство, а тоа не е смислата на интерпелацијата.
Законот за јазици е донесен, но нема потпис од претседателот Иванов. Што ќе се случува понатаму?
ДИМОВСКИ: Во правна смисла, закон се уште нема, за да има закон треба да е потпишан од претседеателот и да е објавен во Службен весник. Тоа е невозможно без потпис од претседател на државата за што нема рок во кој што мора тој да потпише. Тоа значи дека овој закон е ставен ад акта. Доколку некогаш се објави, нам ќе ни се отвори правна можност, како што најавивме, за иницијатива пред Уставен суд, но тоа сега не може да се направи. Ги истражуваме сите правни форми со кои може да влијаеме на внесување на разум кај СДСМ, а посебно кај ДУИ, дека ваквиот однос кон Уставот е штетен за сите граѓани и е осуден од сите граѓани. И, пак, ќе потенцирам дека се направени прекршувања по две линии – едната е содржината на законот кој освен во последниот член кој се однесува на тоа кога законот ќе стапи на сила во сите други членови е неуставен. Втората линија е процедуралната, при што е прекршен Уставот во четири члена, Деловникот во повеќе од десетина, Законот за Собрание…. Значи, и во материјален аспект и во формално процесен аспект законот е катастрофа. Нашите иницијативи се во насока да ги вразумиме и да апелираме до колегите од СДСМ и од ДУИ дека за оваа тема не смее вака да се однесуваат. Сите суптилни теми кои се резултат на пазарџиско комуницирање на владините партнери продуцирале кризи. Такви кризи сме имале и пред воениот конфликт и после. И кога ВМРО е на власт и кога СДСМ е на власт.
Како ВМРО – ДПМНЕ ги менаџираше односите со ДУИ бевме сведоци кога го гласавте Законот за амнестија, односно неговото автентично толкување ?
ДИМОВСКИ: Законот за амнестија е донесен во 2002 година, а е гласан од сите партии. Гласан е и од СДСМ. Суштината на овие процеси кои што имаат државен карактер, што имаат карактер на балансирање на меѓуетничките односи, на меѓународната позиција на државата, на проблемот со името, мора да бидат ставени на маса. Во овој контекст, сакам да кажам дека ние сме длабоко разочарани затоа што парламентот не е информиран за сите придвижувања за проблемот со името. Треба да се разбере дека суптилните теми на вака разнолико општесто мора да се решаваат со поширок, не политички, туку општествен консензус. Политичките партии се тука да ја репрезентираат различноста на општествените компоменти, а ако нема општествен консензус како што нема за Законот за јазиците, тој закон секогаш ќе биде камен во чело, без разлика дали ќе стапи на сила или нема да стапи на сила. Тој самиот е продуцент на проблемите во општеството и во државата. Протестите се последица, а не причина. Последица ќе бидат и други придвижувања, доколку законот стапи на сила. Насилното однесување на мнозинството кон оваа тема продуцира долгорочни кризи и јас многу пати го потенцирам тоа. Апелирав дека не мора со ВМРО да се направи тој консензус, нека се направи тој консензус со професори од Правниот факултет, со професори од Институтот по македонски јазик, со професори албанолози….
Со таков консензус и во таков случај дали би го поддржале законот ?
ДИМОВСКИ: Нам, крајна цел не ние да седнеме на маса за овој закон. Дури и би биле среќни ВМРО – ДПМНЕ да биде надвор од тоа. Целта е да не се продуцираат нови кризи во државата. Политиката е минлива и менлива работа. Тоа го видовме. Но, тоа што го продуцираме денеска, може да создаде проблем подоцна. Потенцирав дека Уставот во 1991 година е донесен без општествен консензус, без поддршка на албанската заедница. Тој Устав продуцираше криза која резултираше со воен конфликт во кој државата имаше жртви, над 80 луѓе ги загубија животите. Сега се носи закон, пак кој има исто така голема тежина, а не е прифатен од македонската страна, и тоа не по партиски линии. И членови на СДСМ се против содржината, но и против насилното донесување на законот. И неутрални граѓани се против…
Вие ги пофаливте пратениците што не го поддржаа Законот за јазиците….
ДИМОВСКИ: Јас тоа го поздравив не само во контекст на законот, туку и во контекст на тоа дека така треба да се гради парламентарната демократија. Ние имаме дефицит на индивидуално повикување на ставови кои ги надминуваат партиските линии. Секоја етапа во развојот на демократијата треба да носи нешто подобро. Ако ние стагнираме, тогаш чуму промени? Зошто ни е промена на власта, ако не одиме напред. Парламентот е централна институција во функционирањето на парламентарната демократија. На Владата и одговара парламентот да не биде силен за да може самостојно да влече чекори. Долги години се соочуваме со тоа дека секој кој ќе се обиде да има индивидуален настап е нападнат. Во тој контекст, имаме предизвик сите да најдеме начин и да го направиме парламентот кредибилен.
Кредибилно е да поднесеш 35.000 амандмани во контекст на конструктивноста на која се повикувате?
ДИМОВСКИ: Да, кредибилно е зошто и во претходното читање на Законот ние поднесовме 84 суштински амандмани. Бевме корекни во односот на Законот. Власта организираше филибастеринг. Ниту за еден амандман не беше отворена расправа, а камоли Собранието да се произнесе или Комисијата. Значи, ни направија класичен филибастеринг на само 84 амандмани. Во таква ситуација кога владејачкото мнозинство нема одговорност, кога лажно се фалат пред меѓународната заедница дека сакаат да ја инкорпорираат и опозицијата, а тоа во реалноста не го прават, мора да најдете инструмент да ги вразумите.
Ова повеќе наликува на инает ?
ДИМОВСКИ: Не е така. Не станува збор за инает.
Кој беше мотивот да поднесете грамада амандмани?
ДИМОВСКИ: Мотивот беше да ги доведеме во ситуација СДСМ и ДУИ и да ги седнеме на маса со нас и со експертската јавност. И да го отворат законот суштински и содржински, и да ги акцептираат сите критики од стручната јавност.
Не очекувавте поинакви сценарија во режија на Џафери?
ДИМОВСКИ: Гледајќи како ова мнозинство се формира, ние не ја искучивме можноста дека ќе постапат исто и кон законот. Мислам дека ова беше комплетно неодговорно однесување кое ништо добро нема да донесе, ниту за државата, ниту за нивните партии. Цената за ваквото насилно однесување скапо ќе ја платат. Нашата цел не беше да се блокира законот или да се блокира дискусија дека треба суштински да се разгледува употребата на малцинските јазици, и на турски, на ромски, на бошњачки .. Но, не вака.
Што очекуваше Вашата пратеничка група?
ДИМОВСКИ: Очекувавме да бидеме викнати и да не прашаат што мислите дека треба да се направи за да го затвориме ова прашање. Не смее со пенали да се решава ова прашање. Фрапантна е казнената политика и наметнувачкиот карактер на употребата на еден јазик. Законот треба да се движи во рамки на Уставот и на Охридскот рамковен договор кој е сосема јасен. Треба да се формира работна група, и оваа тема има уставна содржина во себе и да се отвори прашањето во неговата суштина. Нашите предлози беа глатко отфрлени, иако бевме свесни дека и СДСМ и ДУИ знаат дека законот е неуставен, а и дека и процедурата е катастрофална. Се што се случуваше потоа заличи на некои неубави спомени што сите сакаме да ги оставиме зад нас.
ПАРЛАМЕНТОТ СТАНА НОТАРИЈАТ
Можно ли е во брзо време пратениците на ВМРО – ДПМНЕ да се вратат во Собранието?
ДИМОВСКИ: Мојот став е дека местото на пратеникот треба да биде во Собранието, но тоа треба да биде базирано на реални услови и на реална можност, при што пратеникот ќе ги остварува своите права. Нам ни се одзема правото да предлагаме, ни се одзема правото да дискутираме и да се произнесеме. Не е едно, три се… Во таков момент, комбиниран со фактот дека се случува политички прогон спрема огромен број на луѓе кои се дел од структурите на ВМРО – ДПМНЕ, а ова мнозинство си ги тера постапките и без опозиција, тогаш е очигледно дека повиците на СДСМ и на ДУИ за инкорпорирање на опозицијата, се само за да остват впечаток пред меѓународната јавност. Постапуваат спротивно. Ако имаат намера да ја почитуваат опозицијата, зошто тогаш туркаат постапки како избор на Совет на јавни обвинители, избор на регулаторни тела, член на Уставен суд без опозицијата.
Не се однесува ли оваа критика и на времето кога вие го чиневте мнозинството?
ДИМОВСКИ: Никогаш не сум сакал да генерализирам и не сакам да ги гледам нештата во црно бел филм, тој никогаш не е таков. И најтешките партиски наочари да ги носите не може да гледате така како што гледаат некои помлади колеги од СДСМ, дека се што доаѓа од ВМРО – ДПМНЕ е црно, а тоа што е од СДСМ е бело. Демократијата има развојна компонента. Не сакам да се амнестирам ниту себе си, но искуството треба да носи промени на подобро. Да престанеме да се занимаваме со травијални теми. Треба да разговараме за теми како што се нашите предлози за самостоен собраниски буџет, за самостојна собраниска администрација, обезбедување….Царинските службении се самостојни, но пратениците не се. Судската власт има судска полиција и судски буџет, во Собрание не е е така. Надзорните расправи ни се реткост. Имаме пратенички прашања кои чекаат одговори со месеци. Има министри кои не доаѓаат на пратеничките прашања. Има интерпелации за кои се чека со месеци. Тоа било и во минатите состави на парламентот, не само во овој. Односот на извршната власт и кон своите пратенци е катастрофална. Од парламентот направивме еден орган кој е нотаријат. Тоа највидливо е со Законот за јазиците, една запирка не е сменета. Ова не е парламент, ова е нотаријат.
Како да ги поттикнете пратениците што во бункер преспиваат цел маднат или само бројат денови до неговото истекување?
ДИМОВСКИ: Нема човек што не реагирал на ова. Тоа е општествената критика. Дел од пратеничката работа е и надвор од тоа што го гледаме на телевизија. Има многу добри примери на добри и на лоши пратеници. Има пратеници кои се активни и на собраниската говорница и зад сцена биле активни. Тој сегмент може да се подобри преку изборното законодавство, односно треба да се направат измени во начинот на избор на пратениците, но и да се подобрат условите. Сме имале ситуации кога професори, доктори, инжинери не прифаќале да бидат кандидати за пратеници затоа што не гледаат мотив во тоа.
Има ли вистина во тоа дека Мицкоски и Заев се договориле притворените за крвавиот четврток да се бранат од слобода?
ДИМОВСКИ: Се сомневам дека таа тема може да се разговара на тоа ниво. Но, факт е дека сите ние го имаме чувството на реална насочена постапка на репресирање на опозицијата. Наместо, да се отвори дебата со оние што не ги поддржуваат, тие потикнуваат монолог. За жал за многу теми во нашето општесто се води монолог, а не дебата. Од тој апсект, колку повеќе СДСМ разбере дека овој грамаден политички прогон што го прави, и бркањето на неколку илјади луѓе од работа, толку полесно ќе ја надминеме поларизацијата на општеството. Колку и да сакате да го напаѓате ВМРО во оваа ситуација дека е дел од поларизирањето на општеството, сепак алатките се кај власта. Доколку во еден град како Прилеп над 600 луѓе поради партиска припадност останат без работа, тогаш во самиот град и кај граѓаните, создавате анимузитет и длабок јаз. СДСМ ветуваше еднакво општество за сите, еднаква правда за сите, живот за сите… Тие не само што не го испорачаа тоа, туку сосема спротивно од тоа што го зборуваа на изборите е и третманот на одредени функционери на СДСМ и одредени функционери на ДУИ. Ние ќе останеме критични на овие теми, но нашата критика не е само за да апелираме да се вразумат. Еуфоријата треба да ја заборават, медениот месец на СДСМ заврши. Тие имаат сметки што треба да ги испорачаат спрема граѓаните што ги поддржале. Ниту ги испорачаа ветувањата за економски раст, нема поврат на ДДВ, ниту ги испорачаа веувањата за реформи во образованието, ниту во здравството. Не ги испорачаа ветувањата за нови инвестиции, за еднаков пристап за вработување… Сетоа тоа порано или подоцна ќе дојде како политичка сметка. Нека не не перцепираат нас во својот политички настап, нека се потсетат на себе и на ветувањата што им ги дадоа на граѓаните.
Господине Димовски, најавивте мајски демонстрации и барање за предвремени парламентарни избори. Се чини дека ги копирате СДСМ во практикувањето на уличната демократија, настрана што впечатокот е дека партијата се уште не е консолидирана по конгресот во Валандово, а најавува притисок за предвремени избори ?
ДИМОВСКИ: Предизвици за ВМРО се уште постојат. Во процес сме на сериозни разговори околу внатрешното уредување на партијата, концептот и понудата. И од тој аспект предизвици се уште постојат. Се надеам дека многу скоро ќе ги затвориме тие теми и ќе покажеме дека ВМРО – ДПМНЕ може и различно да постапува. Тоа со кое го критикувам СДСМ, ќе го искористам и за анализа на ВМРО – ДПМНЕ. Секоја следна фаза на партијата, треба да биде подобра од претходната, тоа не го правиме само заради нас, туку и за граѓаните кои кога ќе дојдат на гласачките кутии тие треба да бидат сугурни дека ВМРО е вистинскиот репрезент на тие вредности и реалната алтернатива. Мисам дека партијата мора да ја помине фазата на разгледување на тие прашања. Се надевам дека тоа набрзо ќе заврши. Комотното и неодговорно однесување на СДСМ е на некој начин резултат и на нивната перцепија кон опозицијата. Колку побрзо ВМРО – ДПМНЕ ќе го направи тоа, толку подоро ќе биде не само за партијата, туку и за граѓаните и за државата.
Пак ќе Ве прашам, ја копирате ли СДСМ ?
ДИМОВСКИ: Јас би одговорил со прашање – Дали СДСМ ја копира ВМРО -ДПМНЕ во начинот на кој што владее? Протестите се легитимно право на граѓаните. Допрва доаѓаат предизвиците и за ВМРО – ДПМНЕ и за СДСМ. ВМРО да го претстави својот нов концепт, а СДСМ барем во мал дел да ги оствари ветувањата дадени на изборите. Како тргнале, мислам дека нивниот пад, барем што се однесува до поддршката од граѓаните, ќе им се случи многу побрзо од она што тоа му се случи на ВМРО.
Најавените мајски протести како да се темпирани за да се поклопат со завршницата на преговорите за името и независно од исходот ВМРО – ДПМНЕ да поентира на крајот ?
ДИМОВСКИ: Оваа тема треба да ја разговараме како тема од високодржавно и од национално значење. За жал, оваа тема нема таков третман. Актуелно е дека во Македонија е стасан предлог договор за решавање на прашањето за името од грчка страна, а исто има информација дека и Македонија подготвила таков предлог. Жално е што за тоа не е информирана ниту опозиијата, ниту било кој и да е во парламентот. Тоа е еднострано и неодговорно однесување. Власта не смее така да постапува, целиот терет сама на себе да го презема. Ако Вас никој не ве праша, утре нема да имате никаква одговорност за процесите. Мислам дека суштински се уште не е јасно каков е односот на Република Грција спрема постоењето на нашата држава. И дали Грција, сака да поддржи постоење на Република Македонија во ваков контекст во кој постоиме и живееме. Нападите против нашиот идентитет и против нашиот јазик се секојдневни. Ние забораваме да видиме какво е единството на општеството и на политичката елита во Грција. Понекогаш се појавува некој како Ципрас кој треба да ја игра улогата на добар полицаец, а и некој како Павлопулос или Каменос кои се лошите полицајци. Но, кај нив усогласувањето на ставовите е редовно и не мислам дека нивната крајна цел и стратегија се разликува во умот на претседателот Павлопулос и во умот на премиерот Ципрас. Ние тоа не го учиме и не го гледаме. Затоа, јас апелирам, дека ние колку и да бидеме шармантни и позитивни, колку и да сакаме да оставиме добар впечаток, што оваа Влада реално се трудеше да го направи, односот на грчката страна сега и секогаш во минатото бил ист. Имало вакви периоди и во мандат на други премиери, во мандатот на премиерот Бучковски кој имаше интензивна коминикација и многу добри односи со тогашната власт во Грција. Добра релација се воспостави со поранешните грчки власти и во времето на Груевски и Папандреу, а претходно и Георгиевски имаше одлични релации со Симитис, кој како премиер доаѓаше во Скопје. Секогаш, имав впечаток, колку ние да бевме добри и позитивни и колку и да прифатиме од позициите на грчката страна, утредента имаше нови. Нашата влада непотребно беше шармантна и позитивна и како плод на тоа, се испостави дека грчката страна ги зголеми своите барања. И сето тоа со апсолутно државно организирање протести од кои требаше да се презентира дека имаат притисок од јавноста, а сами ги организираа тие протести. Од тој апсект, јас сум апелирал до меѓународната заедниаца да си ја расчисти дилемата кај себе и да го насочи притисокот таму каде што е проблемот.
Зошто не му го чувате грбот на Мицкоски на јавните настапи? На прес конференциите може да видиме други Ваши колеги, но Вие редовно отсуствувате?
ДИМОВСКИ: Мојата цел на сите постапки што се случија пред и после конгресот не е поврзана со лична амбиција. Јас и пред конгресот кажав дека немам намера да се кандидирам за претседател, ниту сега имам таква амбиција. Но, сметам дека имам доволно минат труд зад себе и од партиски аспект сум ги поминал сите скалила, сум почнал од најниско ниво во организациска смисла. Имам големо искуство и имам понесено голема тежина со учество на процеси во државата и на тој начин имам и обврска да посочам некои работи што ВМРО – ДПМНЕ може подобро да ги организира и подоброи да ги насочи. Во моментот веќе имаме остварено редовна комуникација со Мицкоски, многу отворено зборуваме за овие преспективи и за концептите по кои треба да се движи ВМРО во иднина. Се надевам дека ќе се најдеме во тој процес и дека ќе излеземе посилни како партија. Тука секако одговорноста на Мицкоски е далеку поголема. Тој како претседател има обврска да ги интегрира сите сегменти и да ја изгради партијата во насока на тоа да биде сигурен дека партијата ќе победи на првите следни парламентарни избори.
Искуството, работата, кредибилноста на Илија Димовски, како да не беше доволно вреднувана кога се избираше Извршниот комитет на партијата. Вие не сте дел од ИК, дали се чувствувате излорирани од партијата по отворениот и критичен настап пред конгресот во Валандово ?
ДИМОВСКИ: Напротив, моите политички мисли и идеи и вака можам да ги пласирам и да добијат одек и во партијата внатре и во јавноста. Впрочем, ниту сме се родиле, ниту пак ќе умрема на исто место во животот. Од тој аспект сум комплетно растеретен. Многу повеќе би ценел и повеќе ви ми значело дали се вреднувани моите предлози и идеа, отколку дали би имал или би немал одредена позиција во партиската структура. Тоа не се однесува само на Илија Димовски. Мислам дека има цела плејада на други личности кои не се дел од ИК, а кои имаат богато искуство, имаат интелектуална супериорност, постигнувања во поедини области. ВМРО треба да најде начин сите тие квалитети да ги инкорпорира во канален ред за да може партијата да биде реална алертнатива на лошото владеење на СДСМ.
Најавивте статутарни промени со широк принцип на избор на лидер, но и на членови на партиските органи…
ДИМОВСКИ: Се уште не е дојдено во таа фаза. Јас застапувам што е можно поширок принцип за избор на лидер и на партиски органи. Колку поголема поддршка добивате, толку поголема моќ имате во смисла на проектирање на добри идеи во партијата. Во тој сегмент и изборот на партиските органи треба да биде врз основа на поширок принцип. Тоа го мислам и за изборот на органите на републичко ниво, но и на локалните. Тоа не било пример во ниту една партија. Имам чувство дека критиката е пред се насочена кон ВМРО – ДПМНЕ.
Ќе обзнаните ли фракција во ВМРО – ДПМНЕ?
ДИМОВСКИ: Јас сум дел од ВМРО – ДПМНЕ и благодарие на идеолошката традиција што ја носам во себе, јас партијата не ја перцепирам само во ликот на раководството, туку ја перцепирам и во ликот на илјадници членови на партијата со кои сум соработувал. Немам намера да правам ништо што би и нанело штета на партијата. Се што мислам дека е добро за партијата спремен сум да го приложам во партиските органи, а тоа и го правам. Мислам дека СДСМ лошо владее, а ВМРО има обврска да изгради подобра алтернатива за граѓаните. Немам намера да ја напуштам партијата, ниту имам намера да правам фракции во партијата. Исто така, немам намера да не давам идеи и да не критикувам кога ќе биде потребно.
