Деновиве, Издавачката куќа „Слово“ од Скопје, ја објави книгата Зад маската на патриотизмот: анатомија на еден авторитарен режим од професорот, и поранешен амбасадор Ѓорѓи Спасов. Станува збор за книга колумни и есеистички текстови кои претставуваат анализа на феномените на тоталитаризмот воопшто и, посебно, една вивисекција на тоталитарниот режим кој беше инсталиран во Македонија во годините меѓу 2006 и 2017 година.
Во книгата на околу 330 страници се поместени анализи на изборните и владините кампањи во периодот од 2007 до 2017 година, на идеологијата на македонската десница, процесот на лустрацијата и политиката на власта во овој период кон соседните земји.
„Пишувањето колумни“, вели авторот на оваа книга, „може лесно да ве претвори во обичен пропагандист, а колумната да ја претвори во пропаганден памфлет. Но, со малку повеќе амбиција , таа може да биде и еден вид кус расказ, во чие читање, ако има приказна може подеднакво да се ужива како во убавата книжевност, во која спаѓа и политичката сатира. Од друга страна ,вели тој, тоа е можност за пишување на мал политички есеј, кој ги појаснува нештата од страна на нивната помалку видлива димензија“.
