Американскиот претседател Доналд Трамп објави на Твитер дека „трговските војни се добри и лесно се добиваат“.
Трамп вчера рече дека од идната недела САД ќе воведат царини за увоз на челик од 25 отсто, а алуминиум од 10 отсто за да се заштитат американските производители.
Од Белата куќа подоцна беше соопштено дека некои детали сепак, мора да се разгледаат.
„Кога државата (САД) губи многу милијарди долари во трговијата со речиси секоја држава со која работи, трговските војни се добри и лесно се добиваат“, напиша Трамп на Твитер.
„На пример, кога губите 100 милијарди со некоја држава, а таа се прави паметна, немојте да тргувате повеќе со неа – многу добиваме. Тоа е барем лесно“, пшишува во пораката.
Најавата за царини ги поттикна цените на акциите на американските производителки на челик и алуминиум, па така акциите на Ју-Ес Стил поскапеа речиси шест отсто.
Како што објави претходно МИА; ЕУ „остро и пропорционално ќе реагира во одбрана на своите интереси“, изјави претседателот на ЕК Жан Клод Јункер. ЕК во следните денови ќе претстават предлог за противмерки за САД според правила на СТО.
