Стивен Хокинг, најсјајната ѕвезда на космологијата, почина на 76 години. Физичарот и автор на „Кратка историја на времето“ почина во својот дом во Кембриџ. Неговите деца рекоа: „Ќе ни недостига засекогаш“.
Стивен Хокинг, најсјајната ѕвезда на научното небо, чии согледувања ја обликуваа модерната космологија и инспирираа милионска светска публика, почина на 76 години.
Неговото семејство утрово соопшти дека Хокинг починал во неговиот дом во Кембриџ.
„Длабоко сме тажни шт нашиот сакан татко денес почина. Тој беше голем научник и извонреден човек, чија работа и наследство ќе живеат многу години. Неговата храброст и упорност со неговата брилијантност и хумор ги инспирираа луѓето низ целиот свет. Тој еднаш рече: ‘Ова и немаше да биде некој универзум ако не беше дом на луѓето што ги сакате’. Ќе ни недостига засекогаш“, соопштија децата на Хокинг, Луси, Роберт и Тим.
За колегите научници и за најблиските, она по што ќе биде запаметен Хокинг се интуицијата и чудното чувство за хумор, исто колку што и жестокиот интелект, кој, заедно со неговата болест, ги симболизира неограничените можности на човечкиот ум.
Во 1963 година, на возраст од 21, на Хокинг му беше дијагностицирана болест на моторните неврони. Лекарите очекуваа да живее само уште две години. Но Хокинг имаше форма на болеста што напредува побавно од вообичаеното. Тој живееше уште повеќе од половина век.
