Високата претставничка за надворешна и безбедносна политика на Европска унија, Федерика Могерини денеска апелираше до министрите за надворешни работи на Русија, на Иран и на Турција да го одржат прекинот на огнот во предградието на Дамаск, Источна Гута, како и во другите подрачја, што се под опсада во Сирија.
Таа истакна дека треба да се воведе „хуманитарна пауза“ односно прекин на огнот, што ќе трае 30 денови ширум Сирија.
Могерини исти така побара од Русија, од Иран и од Турција да ги преземат сите „неопходни чекори за завршување на борбите, народот на Сирија да биде заштитен, како и конечно да се овозможи пристигнување на хуманитарна помош и медицинска евакуација на населението“.
ЕУ на 24 и 25 април ќе одржи меѓународната конференција за Сирија во Брисел.
На предлог на Русија од вчера во Источна Гута во сила е секојдневен петчасовен прекин на огнот. Но, и покрај примирјето продолжуваат борбите во предградието на Дамаск.
ФОТО: EPA/OLIVIER HOSLET
