Претставничкиот дом на Флорида ги усвои реформите за законот за оружје, кои меѓу другото, предвидуваат и ограничувања при купувањето оружје и програма за вооружување на дел од наставничкиот кадар.
Предлогот ќе биде проследен до гувернерот Рик Скот да го потпише. Претходно и Сенатот на Флорида го одобри овој закон, со кој се зголемува долната граница за купување оружје на 21 година и се воведува тридневен период на чекање при купувањето оружје.
Долната граница за купување пиштол и досега беше 21 година, но некој со 18 години може да купи пушка на Флорида, а да не е ограничен со период на чекање.
Законот доаѓа еден месец откако момче со полуавтоматска пушка АР-15 влезе во училиште во Паркланд на Флорида и застрела 17 лица.
Американскиот претседател Доналд Трамп претходно сугерираше дека вооружувањето наставници би можело да помогне при спречување масакри, како тој на Флорида.
ФОТО: EPA/CRISTOBAL HERRERA
