Трет ден откако швајцарскиот GSOL го започна производниот процес во ФЕНИ, но исто така и откако го објави новиот предлог кон кавадаречките транспортери, кои сè уште инсистираат да бидат целосно платени од GSOL, иако ниту со Договорот за обработка на никелова руда, ниту пак во оваа фаза од стечајниот процес, тие (GSOL) имаат таква обврска.
Добро информирани кавадарчани, но исто така и вработени во ФЕНИ велат дека поранешниот менаџер на ФЕНИ е во постојана комуникација со транспортерите, барајќи од нив да ја бојкотираат работата на ФЕНИ, со ветување дека бугарскиот Минстрој би бил конечниот сопственик на комбинатот и дека во тој случај, транспортерите, особено оние „најгласните опозиционери” ќе бидат соодветно наградени и привилегирани. Поради тоа и оние превозници кои сакаат да ја прифатат понудата од GSOL стравуваат од можни притисоци.
Но, уште поважно, вработените, исто така, велат дека причината зошто поранешниот менаџмент е во комуникација со Минстрој е поради тоа што по неуспехот со Енекод, треба да биде новото лице на Кунико Рисорсис, поранешниот сопственик на ФЕНИ. Идејата е да се замени приказната со друга компанија која треба да го преземе ФЕНИ и да овозможува лесен излез за луѓето кои се одговорни за лошата состојба во комбинатот. Минстрој нема рудник за репроматеријали, а тоа значи дека ја нема основата за да го преземе ФЕНИ. Претпоставките се дека набавката на руда ќе биде од ТЕЛФ АГ, компанија што е во сопственички релации со Кунико Рисорсис, преку која ФЕНИ во минатото купуваше руда и продаваше никел. Вработените во ФЕНИ уште повеќе се загрижени дека сега Кунико ги злоупотребува транспортерите и ги доведува во конфликт со вработените, кои велат дека ќе ја бранат својата иднина на секој можен начин и уште повеќе поради заканите упатени до нив од поранешниот управител дека сите оние кои се „кооперативни“ на сегашната структура во ФЕНИ, се веќе на нивната листа за снимање. На оваа закана вработените во ФЕНИ велат дека по долго време сега веќе не се плашат, бидејќи конечно гледаат вистинска иднина за ФЕНИ.
Само за потсетување, ФЕНИ после 6 месеци, во понеделникот повторно го започна производниот процес.
