Во рок од 90 дена по стапувањето на сила на новиот Закон за енергетика ќе биде извршен избор на универзалниот снабдувач со електрична енерегија. Овој снабдувач ќе им продава струја на граѓаните кои не сакаат да купуваат струја од слободниот пазар.
Оваа информација беше презентирана на денешната заедничка прес-конференција на вицепремиерот за економски прашања Кочо Анѓушев и министерот за економија Крешник Бектеши.
– Универзален снабдувач ќе може да биде секој лиценциран трговец на електрична енергија кој ќе одлучи да формира таква компанија – појасни вицепремиерот за економски прашања Анѓушев.
Тој информира и дека цената на електричната енергија за домаќинствата ќе биде гарантирана и по целосната либерализација нема да порасне.
– Цената на електрична енергија за домаќинствата е гарантира со две работи. Прво ЕЛЕМ во првата година со 80 отсто од своето производство ќе го снабдува универзалниот снабдувач со електрична енергија кој се воведува со овој закон. Се воведува гарантирана цена на енергијата и дополнително се воведува процес на надминување на енергетска сиромаштија кој ќе придонесе да се надминат состојбите – рече Анѓушев.
Во план е во наредните години, информира Анѓушев, ЕЛЕМ да ги намалува количините на електрична енерегија наменети за универзалниот снабдувач на електрична енергија и до 2025 година да го сведе на 30 отсто.
