Претседателот на Иран, Хасан Рохани го достави предлог буџетот до Парламентот, прв откако САД воведоа санкции кон Техеран.
Новиот буџет од 47,5 милијарди долари, е двојно помал во споредба со минатогодишниот, пред се поради падот на вредноста на иранската валута по одлуката на американскиот претседател, Доналд Трамп да ги повлече САД од мултилатералниот нуклеарен договор од 2015 година.
Пред една година за еден американски долар се добиваа 42.000 ирански ријали, а денес 100.000 ријали. Владата планира да финансира 35 отсто од буџетот со приходите од нафтата.
САД повторно воведоа санкции кон Иран во ноември, но голем број држави продолжија со увоз на иранска нафта. Рохани изјави дека санкции му нанесоа штета на Техеран, но оти тие нема „да го клекнат на колена“ Иран.
