Делови од народни носии и накит, како и предмети за домаќинство направени од дрво, текстил, метал и грнчарија, ќе бидат дел од изложбата „Етнолошкото наследство на малцинските етнички заедници“ што ќе ја отвори вечер Музејот на Македонија.
Како што информира Музејот, експонатите датираат од периодот меѓу 19. и средината на 20 век, а во себе ја носат колективната историска и емоционална меморија на заедниците: Албанци, Турци, Роми и Власи. Тие ги раскажуваат приказните за минатите времиња и културните достигнувања на етничките групи, со што се потврдува и зачувува нивниот идентитет.
За отворањето е најавено присуство на министерот за култура, Асаф Адеми, на министерот за дијаспора, Едмонд Адеми, како и на евроамбасадорот Самуел Жбогар. Пред присутните ќе зборува директорот на Музејот на Македонија, Гордан Николов.
