Српскиот министер за надворешни работи Ивица Дачиќ изјави дека идејата за разграничување меѓу Србите и Албанците, која може да подразбира и промена на границите, „не е оставена по страна“, туку преставува „единствена конкретна иницијатива во оптек“.
Дачиќ во интервјуто за весникот „Блиц“ рече дека „статус квото е невозможна состојба“, која би резултирала со исчезнувањето на Србите од Косово и одземање на српското верско и културно наследство на Косово.
– Идејата за разграничување не е ставена по страна, напротив. Една од последните потврди за тоа стигна од командантот на КФОР-Салваторе Куочи, кој рече дека границата меѓу Србија и Косово не постои и дека тоа што се подразбира дека е граница, ќе се одреди само преку договор и дијалогот на Белград и Приштина – кажа Дачиќ.
По повод најавите за нова конференција на која може да се најде решение за односите меѓу Белград и Приштина, Дачиќ за српски „Курир“ наведе дека е помалку важно дали договорот Белград-Приштина ќе биде потврден на меѓународна конференција или во некој друг формат.
– Се надевам и целта ни е да дојдеме до меѓународна конференција, но уште поважно е за компромисот за Косово да добиеме потврда и гаранции од највлијателните светски фактори. Ова е неопходно за договорот да се примени и почитува, не поради нас, туку поради Приштина која безброј пати го прекрши договореното – истакна шефот на српската дипломатија.
ФОТО: EPA/ANDREJ CUKIC
