Делегација на Стопанската комора на Македонија утре во Атина, Република Грција, ќе учествува на еднодневниот Бизнис форум и билатерални средби меѓу македонски и грчки стопанственици, настан кој Комората го организира во соработка со Атинската трговско-индустриска комора, во насока на интензивирање и зголемување на економската соработка меѓу Република Македонија и Република Грција.
Како што соопшти Комората во делегацијата ќе бидат компании-членки на Комората од повеќе различни сектори (вклучувајќи компании од градежништвото, металната индустрија, прехранбената индустрија и трговијата).
На Бизнис-форумот компаниите ќе имаат можност да ги презентираат своите интереси за соработка и можности за инвестирање, во насока на зајакнување на деловните односи меѓу двете земји, а по завршувањето на официјалниот дел, компаниите ќе можат да остварат и директни средби со компании од соодветните дејности.
Вкупната трговска размена на Република Македонија со Република Грција за периодот јануари – септември 2018 година е во вредност од 748,1 милиони доалри, со пораст од 24,9 отсто во однос на истиот период од претходната година. При тоа, остварен е извоз во вредност од 171,4 милиони долари, со пораст од 9,8 отсто споредено со периодот јануари – септември 2017 година, додека увозот изнесува 576,7 милиони долари, со пораст од 30,2% споредено со истиот период минатата година. Република Грција е втор трговски партнер на Република Македонија.
