На брачна двојката од американската сојузна држава Луизијана добро им дошло чистењето на станот во пресрет на Денот на благодарноста, бидејќи во текот на таквите домашни работи пронашле добитно лото ливче, пренесе „Би-би-си“.
Тина Еренберг за локалните медиуми изјавила дека нашла куп стари ливчиња во еден од шкафовите додека го чистела домот, што требало да биде подготвен за пречек на семејството по повод Денот на благодарноста.
Сепак, едно од пронајдените ливчиња на семејството му донело добивка од 1,8 милиони долари. Добитното ливче брачната двојка го пронашла околу две недели пред истекот на крајниот рок.
„Ја проверувавме добитната комбинација безброј пати“, рекол Харолд Еренберг во седиштето на лотаријата.
Тој додадал дека постојано очекувале нешто да тргне во погрешна насока, пред официјално да ја добијат наградата.
Двојката живее во Мандевил, гратче недалеку од главниот град на Луизијана, Батон Руж.
