Кремљ денеска изрази надеж за конструктивен и трезвен пристап на Вашингтон кон односите меѓу Русија и САД по разрешувањето на државниот секретар Рекс Тилерсон.
– Малку е веројатно дека нашите односи ќе се влошат уште повеќе, рече портпаролот на рускиот претседател Владимир Путин, Дмитриј Песков на брифинг во Москва.
Тој нагласи и дека Русија нема никаков однос кон случајот со поранешниот полковник на руската Главна разузнавачка управа, Сергеј Скрипал, кој беше затруен со нервени гас во Велика Британија
– Москва апсолутно не прифаќа неосновани и со ништо недокажани обвиненија на своја адреса и не го прифаќа јазикот на ултиматуми, рече Песков.
Одговарајќи на прашање дали Москва стравува од меѓународна изолација поради случајот со Скрипал, портпаролот на Кремљ, изрази надеж дека „ќе надвладее здравиот разум и оти другите земји во најмала рака ќе се замислат дали има докази или не, и колку се оправдани сите обвинувања на адреса на Москва“.
Песков најави дека денот по претседателските избори в недела на 18 март ќе биде обичен работен ден за претседателот Владимир Путин.
– Претседателот има работни планови за 19 март. Засега тие нема да се објавуваат, но тоа ќе биде обичен работен ден, истакна тој.
