Ветеринарната медицина како дисциплина има големо значење за здравствената заштита на животните и безбедноста на храната, затоа и Министерство за земјоделство, шумарство и водостопанство во соработка со Агенцијата за храна и ветеринарство, интензивно работи на подобрување на благосостојбата на животните ни обезбедување на безбедна храна на граѓаните, изјави министерот за земјоделство шумарство и водостопанство Љупчо Николовски.
Николовски ова го изјави на 5-ти состанок на Меѓународниот Конгрес на групацијата ,,Вет-Истанбулска група“ и 8-миот Меѓународен научен собир „Денови на ветеринарна медицина 2018″ кој се одржа во Охрид.
Николовски рече дека за активностите веќе има и признанија од ЕУ.
– Признание за мерките во делот на ветеринарната медицина, добивме и од Европската комисија на последната меѓународна конференција за „Прекугранични болести кај животните во Европа“, што неодамна се одржа во Брисел. Европската комисија, ја пофали Македонија за мерките кои што ги преземаме и кои во најголем дел се усогласени со европските регулативи. Посебно признание како држава добивме за начинот на спроведувањето, заштитата но и за применетите политики при појавата на болеста јазлеста кожа во 2017 година, што за нас претставува доказ дека се движиме по вистинскиот пат. Македонија, веќе има воспоставено систем за информирање и брзо откривање, односно воведени се мониторинг програми за детекција на овие болести, обуки со одгледувачите и издадени се прирачници за јавноста- рече Николовски.
Николовски додаде дека заедно со АХВ интензивно се работи на усогласување со ЕУ регулативи од оваа област.
На конференцијата беше присутен и директорот на Агенцијата за храна и ветеринарство, Зоран Атанасов, кој ги презентираше активностите што АХВ ги презема во областа на ветеринарната медицина.
Деканот на Факултетот за ветеринарна медицина при УКИМ, Лазо Пендовски, ги презентираше научните истржувања и проектите на кој работи факултетот, а кој што во голема мерка влијаат врз унапредување на ветеринарната медицина.
Оваа година на конференцијата присустваа и многу странски експерти,кои ги презентираа своите научни трудови во оваа област.
