Во Агенцијата за електронски комуникации (АЕК) денеска ќе се одржи работен состанок со претставници од регулаторните тела за електронски комуникации од Србија, Босна и Херцеговина и Црна Гора.
„Посебен фокус ќе биде посветен на резултатите од досегашните активности за роаминг услугите како и следните чекори кои што ќе се преземат за поевтинување на роаминг и меѓународните разговори“, соопшти АЕК.
Како што стои во соопштението, целта е да продолжи соработката, размената на информации и натамошните мерки со цел корисниците на електронски комуникациски услуги од овие четири држави да можат да ги користат услугите по поповолни услови и цени.
Од 2014 година до сега регулаторите на четирите држави договорија намалување на цените во роаминг на повиците за 83,5 отсто, на СМС за 70 отсто и на интернетот за 94,4 отсто.
