Извозот на стоки од Македонија во првите шест месеци од годината бележи раст од 26,5 отсто. Според податоците на Државниот завод за статистика, вредноста на извезената стока за периодот јануари-јуни 2018 година изнесува 3,3 милијарди американски долари.
Вредноста на увезената стока во првото полугодие изнесува 4,4 милијарди долари и бележи раст од 24 отсто.
Трговскиот дефицит, во периодот јануари – јуни 2018 година, е 1,1 милијарда долари. Покриеноста на увозот со извоз, во периодот јануари – јуни 2018 година, изнесува 74,9 отсто.
Најмногу се извезувало катализаторите на носачи со благородни метали или нивни соединенија, сетови на проводници за палење и слично, за возила, авиони или бродови, делови на седишта и моторните возила за превоз на 10 или повеќе лица.
Во увозот најмногу се застапени платината и легурите на платина, необработени или во прав, нафтените масла и маслата добиени од битуменозни минерали (освен сурови), плоснатоваланите производи од железо или нелегиран челик, неплатинирани или необложени и другите метали од платинската група и нивни легури, необработени или во облик на прав.
Според вкупниот обем на надворешнотрговската размена, Република Македонија најмногу тргувала со Германија, Велика Британија, Грција, Србија и Бугарија.
