Центарот за граѓански комуникации објави база на податоци со сите набавки на општините во 2017 година.
Базата ги содржи сите 2.737 договори за јавни набавки склучени меѓу 80-те општини и Градот Скопје со 1.048 фирми. Базата овозможува пребарување на тендерите по општини и по фирми, како и графички прегледи на учеството на фирмите во набавките на секоја општина одделно. Нуди и податоци и за уделот на набавките во буџетите на општините, како и за вредноста на набавките по жител.
Во 2017 година општините потрошиле за јавни набавки 80 милиони евра, што е за 44 отсто помалку од претходната година. Базата содржи податоци за општинските тендери за последните три години.
Базата на податоци за јавните набавки открива голем јаз помеѓу вредноста на набавките на општините. Само десет општини потрошиле за јавни набавки половина од парите што ги трошат сите општини заедно, односно околу 42 милиони евра. И кај фирмите е забележана истата концентрација. Првите десет фирми со најголема вредност на договорите за јавни набавки заедно учествуваат со 22 отсто во вкупната вредност на набавките на општините.
Базата на јавните набавки на општините е дел од предвидените десет истражувања и бази на податоци за трошењето на јавните пари кои ќе се реализираат во рамките на проектот Јавно трошење за јавно добро, поддржан од проектот на УСАИД за граѓанско учество.
Целта на проектот што го спроведува Центарот за граѓански комуникации е зголемување на ефективноста на јавното трошење преку намалување на корупцијата и зголемување на транспарентноста.
