Во склоп на неговата светска турнеја, од сите локации во регионов, Шон Пол ќе настапи само во Скопје!
Една од најголемите ѕвезди на денешницата, на дружба со македонската публика пристигнува директно од Кардиф, Велика Британија, а по Скопје продолжува кон Азија. Повеќекратниот Греми добитник на скопскиот концерт доаѓа со својата комплетна екипа составена од врвни танчари и музичари. Влезниците за овој уникатен настан во организација на „Фјужн продакшн“ (Fusion Production) и „Акаша букинг“ (Akasha booking) во претпродажба се пуштени денеска, и тоа по специјално намалени цени, во ограничен број преку продажните мрежи на karti.com.mk и mktickets.mk, како и на kupikarti.mk.
Шон Пол Енрикес е роден на Јамајка. Потекнува од спортско семејство, и сосема логично било и тој да се занимава со спорт. Тоа, всушност, и го правел додека бил на возраст меѓу 13 и 21 година. Но, тука завршува спортската приказна и покрај талентот, затоа што сфаќа дека негова љубов е, всушност, музиката.
Првиот сингл го издава во 1996 година – „Baby girl (Don’t cry)“ со продуцентот Џереми Хардинг. Песната станува популарна и не само на Јамајка. 1999 година е година на негов пробив, а веќе во 2000 излегува деби студискиот материјал „Stage One“ и тогаш, всушност, и светот слуша за Шон Пол. Во 2002 година следува „Dutty Rock“ – албум кој се продава во 6 милиони копии. Една од темите „Get Busy“ три недели е на врвот на Билборд хот 100 и една на Билборд хот Ар-ен-би/Хип-хоп (Billboard’s Hot R&B/Hip-Hop). Дуетската песна со Бијонсе „Baby Boy“ е на првите позиции девет и пет седмици. Во 2004 година ја добива првата Греми статуетка за најдобар реге-албум. И тоа е само почеток, зашто во портфолиото на Шон Пол се запишани неколку Билборд музички награди за најпродаван реге музичар и реге албум; потоа за омилен поп или рок музичар на Американските музички награди, најдобар реге пејач на Јамајканските награди…
Не помалку успешен е и неговиот следен проект „The Trinity“ кој се продава во над 4,5 милиони копии… И тоа е само почеток, зашто следуваат се поголеми успеси, како и соработките со Џуси Џеј, 2 Чејнз, Ники Минаж… И, секако, неговата петта Греми номинација. Се редат соработки со Енрике Иглесијас, Фарел Вилијамс, „Литл микс“ „Hair“, Сиа – „Cheap Thrills“, Дуа Липа – „No Lie“, „Клин бандит“ -„Rockabye“ и „Mad Love“ со Дејвид Гета и Беки Џи, која дојде на почетокот од оваа 2018 година.
Концертот е закажан на Стадионот на АРМ, во градскиот парк, со почеток во 20 часот.
