Европската унија се соочува со егзистенцијална криза и може да се распадне за една година, изјави италијанскиот вицепремиер и министер за внатрешни работи, Матео Салвини, јави ДПА.
Во интервју за германското списание „Шпигел” Салвини рече дека Самитот на ЕУ кој неделава ќе се одржи во Брисел, а каде главна тема ќе бидат споровите околу миграцијата и буџетот, ќе покаже дека заедницата е „поделена повеќе од кога и да е”.
– Во следните месеци ќе се одлучи дали Европа се уште има иднина во сегашната форма или целата работа стана бесмислена – вели тој во интервјуто кое денеска беше објавено на англиски јазик.
– Не станува збор само за буџетот за наредните седум години. Следната година ќе има нови избори за Европскиот парламент. За една година ќе видиме дали обединета Европа се уште постои или не, вели италијанскиот министер.
Салвини е лидер на италијанската десничарска партија „Лига”, а меѓу европските сојузници му се унгарскиот премиер Виктор Орбан, шефицата на француската екстремна десница Марин Ле Пен и анти-ЕУ германска партија „Алтернатива за Германија”, потсетува ДПА.
Агенцијата истакнува дека ако овие партии победат на изборите за ЕП на штета на оние кои се залагаат за единство на ЕУ, како што се – Партијата на европските социјалисти и Европската народна партија – тоа ќе доведе до голеmо преуредување на политиката во ЕУ.
