Пет Иранки маскирани како мажи успеаа да влезат на стадионот „Азади“ во Техеран и да навиваат во живо за фудбалскиот клуб Персеполис, кој се бори за титулата шампион на Иран.
Девојките, наместо вообичаената шминка, на лицата имаа залепени бради и мустаќи, а бидејќи во Иран на жените им е забранет пристапот до овие настани, нивните фотографии од стадионот побудија голем интерес и за кратко време се раширија на социјалните мрежи.
Новинарката Масих Алинеџад, која е еден од основачите на Движењето за човекови права во Иран, овој гест на девојките го нарече „граѓанска непослушност“.
Една од девојките соопшти дека на ваков начин досега шестпати била на стадион.
Од Исламаската револуција во 1979 година во Иран на жените им е забранет влез на стадиони, односно гледање на фудбалски натпревари и други спортски манифестации.
