Кинеската национална здравствена комисија соопшти дека од вчера до денеска бројот на починати од епидемијата на коронавирус е зголемен на 910, од кои само во Кина починале 908. Со овие најнови податоци, наведува комисијата, жртвите на новиот тип на коронавирус ги надминаа оние од епидемијата на САРС, која во 2002-2003 година зеде 774 жртви.
Според Светската здравствена организација, бројот на заразени се стабилизира, но е прерано да се каже дека пикот на епидемијата е минат.
Бројот на смртни случаи од коронавирусот во кинеската провинција Хубеи, изворот и жариштето на епидемијата, веќе достигна 871 лица, пренесоа британските медиуми,
Во Хубеи само во последните 24 часа се регистрирани 2.618 нови случаи на заразени со вирусот, со што вкупниот број на заразени во провинцијата достигна 29 631.
Поголем дел од новите смртни случаи се во градот Вухан, каде почна епидемијата на коронавирусот. Градските власти соопштија дека вчера во него починале 73 болни. Вкупниот број на смртни случаи во Вухан достигна 681.
