Барање за укинување на царините за увоз на литиумски батерии за акумулатори доставила Полската амбасада по средба со вицепремиерот Кочо Анѓушев, а со образложение дека извесна полска компанија од овој сектор сака да инвестира во Македонија, откри првата антикорупционерка Билјана Ивановска во интервју за 360 степени.
– Целиот предмет има поголема историја. Кочо Анѓушев присуствувал на седницата на која се расправало за предлог-одлуката за укинување на царините на батериите за акумулатори. Според стенограмите, тој и земал збор и директно учествувал во расправата со насоки како предлог-одлуката треба да се усогласи со Министерството за финансии. Ова е главниот доказ дека Анѓушев не се изземал од оваа предлог-одлука, напротив, учествувал во неа. На крај, полската компанија не инвестирала во Македонија, туку во Србија – рече Ивановска.
Таа рече дека иницијативата од Антикорупциска е доставена до премиерот Зоран Заев. Премиерот може да достави иницијатива до Собранието да биде разрешен вицепремиерот Анѓушев.
– Одлуката е на премиерот. Ние сме должни да ги обелодениме состојбите пред граѓаните. Ги утврдуваме состојбите врз основа на аргументи добиени од владата и министерствата, но и други институции – вели Ивановска.
