Изградбата на гасен интерконектор помеѓу земјава и Грција е клучен енергетски инфраструктурен објект со кој се обезбедува повисока конкурентност за снабдување со природен гас, порача вицепрмеиерот за економски прашања Кочо Анѓушев на панелот „Енергетски безбедносни предизвици во Источниот Медитеран“, што се одржа во рамките на Самитот во Солун.
– Моментално се реализират градежни работи за комплетирање на примарниот гасоводен систем, со кој во системот ќе бидат поврзани сите поголеми градови во земјата, но за да биде комплетен проектот за гасификација, потребно е да се обезбеди и дополнителен снабдувач со гас, покрај моменталната гасоводна цевка со која се обезбедува гас од Република Бугарија. Токму поради тоа во насока на подигнување на конкурентноста во снабдувањето, изградбата на гасоводот со Грција е клучен проект – рече Анѓушев.
Според него земјава е подготовена да започне со овој проект, обезбедени се финансиски средства, изработена е физибилити студија, проектирана е трасата и во тек е изработката на основниот проект и студујата за заштита на животната средина кои ќе бидат готови наскоро, а јавниот повик би требало да се објави на почетокот на 2020 година.
Осврнувајќи се на проектите поврзани со електричната енергија, вицепремиерот посочи дека за стабилноста на енергетските системи е важно да се дискутира за енергетската инфраструктура, изворите за производство на електрична енергија, како и за либерализација на пазарите.
– Сметам дека преносните електроенергетски системи на Балканскиот Полуостров се сосема добро развиени да обезбедат сигурност на мрежата, но колку повеќе преносни мрежи имаме, дотолку подобро, за да ги обезбедиме и прекуграничните капацитети помеѓу земјите – рече Анѓушев.
Кога зборуваме за изворите за производство на електрична енергија во светот, додаде тој, сега се користи терминот „енергетска транзиција“, кој подразбира премин од конвенционалните извори, како централи на јаглен или друг вид на фосилно гориво, во производство од обновливи извори (ОИЕ).
– Сметам дека Северна Македонија е добар пример на земја која започна да ја применува оваа транзиција, во моментов се одвиваат проекти за зголемување на производството од фотоволтаични централи, на принцип на премиуми. Изненаден сум од интересот и подготвеноста на инвеститорите, кои не само што се подготвени да градат фотонапонски електрани по минимални премиум тарифи, туку и се подготвени да градат без никаков премиум, па и да се наддаваат за да ја добијат локацијата за изградба на ваков тип централа – посочи Анѓушев.
Покрај зголемувањето на производството од фотоволтаици, потенцира вицепремиерот, работиме и на зголемување на производството од ветернии електрани и од мали хидро централи, од кои веќе над 70 се во функција, а околу 35 во градба.
– Од моменталните 100 мегавати инсталирана моќност од обновливи извори, со проектите кои ги планираме и реализираме ќе стигнеме до инсталирана моќност од околу 400 мегавати, што е за четири пати повеќе – посочи вицепремиерот Анѓушев.
Тој нагласи дека во догледна иднина го гледа регионот на Југоисточна Европа како единствен пазар на електрична енергија, со една берза за струја, што ќе донесе бенефит за сите граѓани во сите земји од регионот.
