Владата на С. Македонија останува посветена на реформите поврзани со датумот за отворањето на преговори со Европската Унија, и покрај неодамнешната одлука на ЕУ, како и на членството во НАТО, пред се за обезбедување на владеењето на правото, стабилноста и економскиот развој на земјата и подобар живот на граѓаните, порача вицепремиерот за економски прашаеа Кочо Анѓушев од Самитот во Солун.
– Република С. Македонија ги направи сите потребни чекори за добивање на датум за отворање на преговорите, сепак ЕУ донесе одлука која е делумно разочарувачка, а е поврзана со процеси кои се случуваат во самата Унија. Ние остануваме посветени кон евро-атлантските интеграции за кои сметаме дека носат стабилност и просперитет. Членството во НАТО е веќе извесно и се надеваме дека ќе биде овозможено на почетокот на 2020 година, кога очекуваме парламентот во Кралството Шпанија да го ратификува протоколот за пристапување на С. Македонија во НАТО – посочи Анѓушев.
Анѓушев додаде дека во насока на побрз регионален развој, потребна е потполна посветеност и вклученост, особено во европските интеграции на сите земји од регионот. Договорите на Македонија со Грција и Бугарија, Вицепремиерот ги оцени како добар пример на надминување на отворени билатерални прашања и посочи дека делуваат позитивно на економската соработка.
– Економската соработка помеѓу С. Македонија и Република Грција, како и со Република Бугарија, изразена преку трговската размена, бележи позитивни резултати, особено во првата година по потпишување на договорите со овие две земји. Како резултат на овие договори трговската размена со Грција во 2018 година се зголеми за над 20 отсто, додека со Бугарија за над 15 отсто, а одреден пораст на соработката е забележан и во 2019 година. Зајакнувањето на политичката соработка, носи и економски бенефити за регионот – истакна Анѓушев.
