Можностите за засилена климатска акција, преку воспоставување поцврста соработка со Зелениот климатски фонд (ЗКФ) беа тема на разгледување на денешната седница на Националниот совет за одржлив развој насловена како „Унапредување на климатската акција во Република Северна Македонија“ со која претседаваше вицепремиерот за економски прашања Кочо Анѓушев.
Вицепремиерот Анѓушев истакна дека се потребни конкретни и одлучни активности во насока на справување со климатските промени, со заедничко дејствување на сите чинители, вклучително владините институции, локалната самоуправа, но и реалниот и граѓанскиот сектор.
– Соработката со Зелениот климатски фонд е од особено значење како надополнување на напорите на државата да ги достигне сценаријата според кои го има потпишано и ратификувано Парискиот договор за клима, но и достигнување на поамбициозни сценарија, како и да одговори на барањата на Европската Унија. Крајната цел на нашите напори секако е изнаоѓање соодветни, иновативни решенија како одговор на климатските промени. Ние сме сигурни дека преку зголемување на инвестиции за заштита на животната средина, значително ќе придонесеме за унапредување на квалитетот на живот за граѓаните и зголемување на конкурентност на нашата економија – потенцираше вицепремиерот Анѓушев.
Зелениот климатски фонд е нов партнер за финансирање на инвестиции на државата во „зелен” развој, односно развој со ниско ниво на емисии и отпорност кон климатските промени. Во рамки на првиот проект на земјата од Програмата за подготвеност и подготвителна поддршка на Зелениот климатски фонд, чии резултати беа презентирани денес, ФАО ја поддржа Владата да воспостави национален механизам, институционална рамка и процедури потребни за ефикасно искористување на финансиските можности од Фондот.
На денешната седница беа преземени првите чекори за развој на Работната програма на држвава за Зелениот климатски фонд, со објавување на отворен повик за проектни идеи кои би се финансирале преку Фондот. Сите заинтересирани засегнати страни вклучително националните и локалните власти, јавни и приватни претпријатија, граѓански организации, академските установи и други правни лица се поканети да достават идеи за проекти, со конкретни активности за прилагодување кон или ублажување на климатските промени во најмалку еден од приоритетните сектори: енергија, транспорт, водни ресурси, земјоделство, отпад, биодиверзитет, здравство, шумарство и културно наследство.
Проектните идеи можат да се поднесат со користење на електронска апликација, во која се објаснети и чекорите и критериумите за развој на проектна идеја за ЗКФ. Новата веб-страница www.greendevelopment.mk, ќе служи како клучна комуникациска алатка за споделување на знаење и информации за активностите поврзани со Зелениот климатски фондво земјата.
