Претседателот на Чиле Себастијан Пинера изјави дека земјата е „во војна“, по тридневните протести поради зголемувањето на цената на јавниот превоз, во кои загинаа седум лица.
– Ние сме во војна против моќниот и немилосрден непријател, непријател кој не почитува никој и ништо и е подготвен да користи насилство и злосторства без никакви ограничувања, рече Пинера.
Тој во саботата прогласи вонредна состојба во главниот град Сантјаго, по протестите во кои беа запалени многу згради во центарот на градот, а градското метро беше блокирано.
Демонстрантите подметнаа оган на неколку станици во метрото, запалија автобус и ги ограбуваа продавниците.
Пожарникарите соопштија дека пет лица загинале кога избувнал пожар при грабеж на фабрика за облека, додека двајца други загинале во пожар во супермаркет. Две лица биле погодени од куршуми и се хоспитализирани во „сериозна“ состојба по инцидент со полицијата.
За време на протестите беа затворени 136 метро станици, а беше прекинат сообраќајот во должина од околу 150 километри. По полицискиот час, беа откажани стотина летови од аеродромот во Сантјаго и илјадници патници останаа блокирани на терминалите.
Пинера ја суспендираше и одлуката на чилеанската влада за зголемување на цената на јавниот превоз, но, сепак, протестите продолжија поради социјално-економските услови и нееднаквоста во земјата.
Во меѓувреме, властите соопштија дека за време на протестите се уапсени 1.462 лица, 644 во Сантјаго и 848 во другите градови. По три дена насилство, центарот на Сантјаго, како и центрите на другите поголеми градови како Валпараис и Консепсион, се сосема опустошени.
Чиле е една од најбогатите земји во Латинска Америка, но истовремено и една од оние во кои има најголема социјална нееднаквост.
