За можноста за воспоставување на нова директна авиолинија од Скопје до Тел Авив, се разговарало на средбата меѓу министерот за транспорт и врски Горан Сугарески со почесниот конзул на Македонија во Израел, Шломо Грацијани и директорот на Директоратот за воневропски држави, амбасадорот Пајо Авировиќ.
– Развојот на авиосообраќајот е стратешка определба на владата и нашите активности се насочени кон проширување на мрежата на дестинации достапни за граѓаните, преку воспоставување на нови директни авиолинии и интензивирање на соработката со останатите земји во светот. Оваа средба беше одлична можност заеднички да ги разгледаме условите за воведување на нова авиолинија Скопје – Тел Авив, која би била од бенефит за двете земји – изјави Сугарески.
Воспоставувањето на оваа линија ќе придонесе за развој на туризмот, зголемување на економската соработка и промоција на културните вредности и природни богатства на двете земји, истакнал Сугарески.
