Лидерот на Движењето Самоопределува, партија која победи на неделните парламентарни избори во Косово, Албин Курти, се сретна попладнево во Амбасадата на Соединетите Американски Држави во Приштина со претставникот на претседателот Доналд Трамп за мировните преговори меѓу Србија и Косово, американскиот амбасадор во Германија Ричард Гренел.
Како што јави дописникот на МИА од Приштина, средбата на Курти и Гренел се одржа непосредно по завршувањето на средбата на Гренел со косовскиот претседател Хашим Тачи.
Курти по завршувањето на средбата ја напушти Амбасадата без да даде изјава за медиумите, како што немаше изјави ниту по средбата во кабинетот на Тачи.
Гренел, кого Трамп го именува за свој претставник минатиот петок, утре ќа отпатува за Белград, каде што треба да се сретне со српскиот претседател Александар Вучиќ. За време на денешниот престој во Приштина најавени се средби и со претставници на други политички партии.
