Во трката за градоначалник на Истанбул победи Екрем Имамоглу, кандидатот на Републиканската народна партија. Според првичните неофицијални резултати, за него гласале околу 55 отсто или 4 милиони и 600 илјади жители на најголемиот турски град. Веднаш зад него е поранешниот премиер, Бинали Јилдирим, со освоени 45 проценти од гласовите. За останатите кандидати гласале само 0.8 проценти од гласачите.
– Упатувам благодарност до нашиот народ, и до моите сограѓани во Истанбул. Пред очите на целиот свет, вие ја заштитивте демократската репутација на Турција. Вие како народ ја заштитивте вековната демократска традиција. Ви благодарам, мои сограѓани од Истанбул – изјави Екрем Имамоглу.
Kандидатот на владеачката партија за правдата и развојот веќе го призна поразот и му честиташе на Имамоглу.
– Моментално води мојот противкандидат, Екрем Имамоглу. Упатувам честитки до него, и му посакувам успех. Изборите значат демократија. Овие избори уште еднаш покажаа дека демократијата во Турција функционира на најдобар и беспрекорен начин – изјави Бинали Јилдирим.
Жителите на Истанбул, пред изборите беа со поделени мислења. За едни, Имамоглу е надеж дека работите наскоро ќе се променат, други пак сметаат дека е исправна политиката на владеачката партија предводена од Ердоган. За многумина, денешното гласање преставува тест за тоа како ќе се развива државата во иднина.
– Како жител на Турција и млад образовен човек, го подржувам имамоглу бидејќи верувам дека неговите проекти имаат за цел да ги решат вистинските проблеми со кои се соочуваме – изјави Дениз Чаликиран.
– Јас се соочував со многу проблеми во периодот кога оние кои носеа марама поради верски причини не им беше дозволено да се образуваат. 20 години подоцна успеав да се образувам и да станам наставник. Тоа го дозволи АКП и нашиот претседател Ердоган – изјави Сема Акбас.
Локалните избори во Турција се одржаа кон крајот на март оваа година, но Врховната изборна комисија на државата на 6 мај донесе одлука со која ги поништи резултатите за градоначалник на Истанбул, и нареди повторување на изборите.
ФОТО Принтскрин
