Министерот за транспорт и врски Горан Сугарески денеска се сретна со претставници на Синдикатот на индустрија, енергетика и рударство и претставници на вработените на кои им е престанат работниот однос во компанијата „Еурокомпозит 11 Октомври“ од Прилеп и ги ислуша нивните барања.
Како што соопшти Владата, предложено е в понеделник, 10 јуни, да се одржи состанок во поширок состав. Покрај претставници на Владата, ќе присуствуваат и директорот и останатите раководни органи во „Еурокомпозит 11 Октомври“, претставници на здружението на лицата на кои им престанал работниот однос во фабриката, претставници на синдикатот на вработените во компанијата, како и претставници од Синдикатот за индустрија, енергетика и рударство.
На состанокот, како што се наведува во дописот, би се разгледале сите барања од сите засегнати страни, ќе се утврдат приоритети и ќе се пристапи кон креирање динамички план за реструктурирање на оваа компанија во државна сопственост.
Премиерот Заев, вицепремиерот за економски прашања Кочо Анѓушев и министерот за финансии Драган Тевдовски во моментот се на службено патување во Брисел, каде присуствуваат на форум во организација на ЕБОР и поради тоа не биле во можност да се сретнат со нив.
